കൊച്ചി: രാഷ്ട്രീയ പാർട്ടികളുടെ ആഭ്യന്തര കാര്യങ്ങളിൽ അന്വേഷണം നടത്താൻ ലോകായുക്തക്ക് അധികാരമില്ലെന്ന് ഹൈക്കോടതി. തെരഞ്ഞെടുപ്പിലേക്കുള്ള സ്ഥാനാർഥികളെ തീരുമാനിക്കുന്നത് രാഷ്ട്രീയ പാർട്ടികളുടെ ആഭൃന്തര വിഷയമാണെന്ന് ചീഫ് ജസ്റ്റിസ് അധ്യക്ഷനായ ബെഞ്ച് ഉത്തരവിൽ പറഞ്ഞു.

2014 ൽ തിരുവനന്തപുരം ലോക്സഭാ തെരഞ്ഞെടുപ്പിൽ എൽഡിഎഫ് സ്ഥാനാർഥി ഡോ. ബെനറ്റ്ന എബ്രഹാമിന്‍റെ സ്ഥാനാർഥിത്വവുമായി ബന്ധപ്പെട്ട് ആരോപണം ഉയർന്നിരുന്നു. പെയ്മെന്‍റ് സീറ്റ് എന്നായിരുന്നു അന്ന് ഉയർന്ന ആരോപണം. ഈ വിഷയത്തിൽ സ്വകാര്യ വ്യക്തി നൽകിയ പരാതിയിൽ പിന്നീട് ലോകായുക്ത അന്വേഷണത്തിന് ഉത്തരവിട്ടിരുന്നു.

സംഭവത്തിൽ അധികാര ദുർവിനിയോഗവും അഴിമതിയും നടന്നിട്ടുണ്ടെന്ന് കണ്ടെത്തി. തുടർന്ന് അന്നത്തെ സിപിഐ സംസ്ഥാന സെക്രട്ടറി പന്ന്യൻ രവീന്ദ്രന്‍ ലോകായുക്തയിൽ പുനപരിശോധന ഹർജി നൽകി. എന്നാൽ ലോകായുക്ത ഇത് അംഗീകരിച്ചില്ല. തുടർന്ന് പന്ന്യൻ രവീന്ദ്രന്‍ ഹൈക്കോടതിയെ സമീപിക്കുകയായിരുന്നു.