തിരുവനന്തപുരം: കോഴിക്കോട്ട് അവയവം മാറ്റിവയ്ക്കലിനായി 558.68 കോടി രൂപ ചെലവിൽ ഓര്ഗന് ആന്റ് ടിഷ്യു ട്രാന്സ്പ്ലാന്റ് ഇൻസ്റ്റിറ്റ്യൂട്ട് സ്ഥാപിക്കാൻ സർക്കാർ തീരുമാനിച്ചു. അവയവമാറ്റ ശസ്ത്രക്രിയാ മേഖലയിലെ വ്യാപകമായ ചൂഷണം തടയുകയാണ് ഈ പദ്ധതിയിലൂടെ ലക്ഷ്യമിടുന്നത്. ബുധനാഴ്ച മുഖ്യമന്ത്രിയുടെ അധ്യക്ഷതയിൽ ചേർന്ന സംസ്ഥാന മന്ത്രിസഭായോഗം അംഗീകാരം നൽകിയ ഇന്സ്റ്റിറ്റ്യൂട്ടിന്റെ നിര്മ്മാണം നടപടിക്രമങ്ങള് പാലിച്ച് സമയബന്ധിതമായി പൂർത്തിയാക്കുമെന്ന് ആരോഗ്യമന്ത്രി വീണാ ജോർജ് നിയമസഭയിൽ അറിയിച്ചു.
അവയവദാന മേഖലയുമായി ബന്ധപ്പെട്ട എല്ലാ പ്രവര്ത്തനങ്ങളും ഒരു കുടക്കീഴില് കൊണ്ടു വരുന്നതിനാണ് ഈ ഇന്സ്റ്റിറ്റ്യൂട്ട് ആരംഭിക്കുന്നത്. കോര്ണിയ, വൃക്ക, കരള്, കുടല്, പാന്ക്രിയാസ്, ഹൃദയം, ശ്വാസകോശം, മജ്ജ, സോഫ്റ്റ് ടിഷ്യൂ, കൈകള്, ബോണ് മാറ്റിവയ്ക്കല് തുടങ്ങിയവയെല്ലാം ഈ സെന്ററിലൂടെ സാധ്യമാകും. അവയവം മാറ്റിവയ്ക്കലുമായി ബന്ധപ്പെട്ടുള്ള ചികിത്സ, അധ്യാപനം, പരിശീലനം, ഗവേഷണം, അവയവദാന പ്രവര്ത്തനങ്ങള് തുടങ്ങിയവ സാധ്യമാകും. അവയവങ്ങള്ക്ക് കേടുപാട് വന്നവരുടെ ചികിത്സ മുതല് അവയം മാറ്റിവയ്ക്കല് ശസ്ത്രക്രിയയും പുനരധിവാസവും വരെയുള്ള സമഗ്ര പരിചരണം സാധ്യമാക്കുന്ന തരത്തിലാണ് രൂപകല്പന ചെയ്തിരിക്കുന്നതെന്നും മന്ത്രി അറിയിച്ചു.
കിഫ്ബി വഴിയായിരിക്കും നിർമാണം. കോഴിക്കോട് ചേവായൂരില് 20 ഏക്കറിലാണ് ട്രാന്സ്പ്ലാന്റ് ഇന്സ്റ്റിറ്റ്യൂട്ട് സ്ഥാപിക്കുന്നത്. 6 നിലകളുള്ള 4 ബ്ലോക്കുകളുണ്ടാകും. 219 ജനറല് കിടക്കകള്, 42 പ്രത്യേക വാര്ഡ് കിടക്കകള്, 58 ഐസിയു കിടക്കകള്, 83 എച്ച്ഡിയു കിടക്കകള്, 16 ഓപ്പറേഷന് റൂമുകള്, ഡയാലിസിസ് സെന്റര്, ട്രാന്സ്പ്ലാന്റേഷന് ഗവേഷണ കേന്ദ്രം എന്നിവയുള്പ്പെടെ 510 കിടക്കകളുള്ള അത്യാധുനിക ആശുപത്രി സംവിധാനമാണ് വിഭാവനം ചെയ്തിരിക്കുന്നത്. ഒന്നാം ഘട്ടത്തില് 330 കിടക്കകളും 10 ഓപ്പറേഷന് തീയറ്ററുകളും രണ്ടാം ഘട്ടത്തില് 180 കിടക്കകളും 6 ഓപ്പറേഷന് തീയറ്ററുകളും സജ്ജമാക്കുന്നതാണ്. ആദ്യ ഘട്ടത്തില് 14 സ്പെഷ്യാലിറ്റി വിഭാഗങ്ങളും രണ്ടാം ഘട്ടത്തില് 7 സ്പെഷ്യാലിറ്റി വിഭാഗങ്ങളും ഉണ്ടാകും. അധ്യാപനത്തിലും വലിയ പ്രാധാന്യം നല്കുന്നു. 31 അക്കാദമിക് കോഴ്സുകള് ആരംഭിക്കുന്നതിന് ലക്ഷ്യം വയ്ക്കുന്നു.