പാലക്കാട്: സൂര്യാതപമേറ്റ് പാലക്കാട് കുത്തനൂരിൽ ഒരാൾ മരിച്ചു. കുത്തനൂരിലെ പനയങ്കടം വീട്ടില്‍ ഹരിദാസനാണ്(65) മരിച്ചത്. വീടിന് സമീപത്ത് ദേഹമാസകലം പൊള്ളലേറ്റ് മരിച്ച നിലയില്‍ കണ്ടെത്തുകയായിരുന്നു.

അമിതമായി മദ്യപിച്ച ഹരിദാസ് വീടിന് സമീപത്ത് വെയിലത്ത് കിടക്കുകയായിരുന്നുവെന്ന് ദൃസാക്ഷികൾ പറഞ്ഞു. മരണ കാരണം കടുത്ത സൂര്യതാപം മൂലമാണെന്ന് പോസ്റ്റ്മോർട്ടം റിപ്പോർട്ടിൽ പറയുന്നു. മൃതദേഹം ബന്ധുക്കള്‍ക്ക് വിട്ടുകൊടുത്തു.

അതേസമയം അട്ടപ്പാടി ഷോളയൂരിൽ 50 വയസുകാരൻ മരിച്ചത് സൂര്യാതപമേറ്റാണെന്ന് സ്ഥിരീകരിച്ചിട്ടുണ്ട്. ഷോളയൂര്‍ ഊത്തുക്കുഴി സ്വദേശി ശെന്തില്‍ (50) ആണ് മരിച്ചത്. കഴിഞ്ഞ ദിവസം സുഹൃത്തിന്റെ വീടിന്റെ സമീപത്തു ശെന്തിലിനെ അവശ നിലയിൽ കണ്ടെത്തുകയായിരുന്നു. ഇയാളെ ഉടൻ അടുത്തുള്ള കോട്ടത്തറ ആശിപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.