അബുദാബി: സാദിയാത്ത് ദ്വീപിലെ മനാരത് അൽ സാദിയാത്തിൽ ഹാരി പോട്ടർ പ്രദർശനത്തിന് തുടക്കമായി. ഹാരി പോട്ടറിന്‍റെ ജന്മദിനമായ ജൂലൈ 31നാണ് പ്രദർശനം ആരംഭിച്ചത്.

മന്ത്രങ്ങൾ ചൊല്ലാനും, മരുന്നുണ്ടാക്കാനും, ക്വിഡിറ്റ് കഴിവുകൾ പരീക്ഷിക്കാനും ഇവിടെ അവസരമുണ്ട്. ഗ്രേറ്റ് ഹാൾ, ഹാഗ്രിഡ്‌സ് ഹട്ട്, ഹെർബോളജി ഗ്രീൻഹൗസ് എന്നിവയുൾപ്പെടെ വിശദമായ ഫിലിം സെറ്റ് വിനോദങ്ങൾ നിങ്ങൾക്ക് ആസ്വദിക്കാം. ഡ്രാഗണുകൾ, ബോഗാർട്ട്‌സ്, ഗോൾഡൻ സ്നിച്ച്‌സ് എന്നിവ പ്രത്യക്ഷപ്പെടുന്ന വിസ്മയക്കാഴ്ചകളും പ്രദർശനത്തിലുണ്ട്.

ജീവികളുടെ ശബ്ദം മുതൽ വസ്ത്രാലങ്കാരം വരെയുള്ള എല്ലാ കാര്യങ്ങളിലും ശബ്ദ വിവരണത്തോടെ ചലച്ചിത്രനിർമാണ പ്രക്രിയയുടെ ഒരു പ്രത്യേക പിന്നാമ്പുറ കാഴ്ചയും ഒരുക്കിയിട്ടുണ്ട്. 60 മുതൽ 90 മിനിറ്റ് വരെ നീണ്ടുനിൽക്കുന്ന തരത്തിലാണ് ഈ ആസ്വാദനം രൂപകൽപ്പന ചെയ്തിരിക്കുന്നത്.

പ്രധാന വിശദാംശങ്ങൾ:

• സ്ഥലം: മനാരത് അൽ സാദിയാത്ത്, സാദിയാത്ത് ദ്വീപ്, അബുദാബി

• സമയം: ചൊവ്വാഴ്ച ഒഴികെ എല്ലാ ദിവസവും പ്രവർത്തിക്കും. അവസാന പ്രവേശന സമയത്തിന് ശേഷം രണ്ട് മണിക്കൂർ കഴിഞ്ഞ് വേദി അടയ്ക്കും.

• ടിക്കറ്റുകൾ: 115 ദിർഹം മുതൽ ടിക്കറ്റ് നിരക്ക് ആരംഭിക്കുന്നു. ഫ്ലെക്സ്, വിഐപി ടിക്കറ്റുകൾ ലഭ്യമാണ്.

• പ്രായം: എല്ലാ പ്രായക്കാർക്കും പ്രവേശനമുണ്ട്. 3 വയസ്സിന് താഴെയുള്ള കുട്ടികൾക്ക് സൗജന്യം.

• വീൽചെയറിൽ വരുന്നവർക്ക് സൗകര്യം ഏർപ്പെടുത്തിയിട്ടുണ്ട്.