ഏഷ‍്യ കപ്പ് ഫൈനലിൽ ലേഡീസ് റൺ ഫെസ്റ്റ്

ദുബായ്: ശ്രീലങ്കൻ വനിതകളെ കീഴടക്കിയ ഇന്ത്യ ഏഷ്യ കപ്പ് ക്രിക്കറ്റ് കിരീടം തിരിച്ചുപിടിച്ചു. ഫൈനലിൽ മികച്ച ഓൾറൗണ്ട് പ്രകടനം കാഴ്ചവച്ച ഇന്ത‍്യൻ വനിതകൾ 72 റൺസിന്‍റെ കൂറ്റൻ വിജയമാണ് സ്വന്തമാക്കിയത്. ടോസ് നേടി ബാറ്റിങ് തെരഞ്ഞെടുത്ത ഇന്ത‍്യ നിശ്ചിത 20 ഓവറിൽ 5 വിക്കറ്റ് നഷ്ടത്തിൽ 183 റൺസ് അടിച്ചെടുത്തു. ശ്രീലങ്ക 20 ഓവറിൽ 111 റൺസിന് ഓൾഔട്ടായി.

39 പന്തിൽ 9 ബൗണ്ടറിയും 2 സിക്സും അടക്കം 68 റൺ‌സ് അടിച്ചെടുത്ത ഓപ്പണർ ഷഫാലി വർമയാണ് ഇന്ത‍്യയുടെ ടോപ് സ്കോറർ. ഷഫാലിക്കു പുറമെ സ്മൃതി മന്ഥന (39 പന്തിൽ 59) അർധസെഞ്ചുറി നേടി.

ക‍്യാപ്റ്റൻ ഹർമൻപ്രീത് കൗർ 14 റൺസും റിച്ച ഘോഷ് 17 റൺസുമെടുത്ത് മടങ്ങിയപ്പോൾ ജി. കമാലിനി പുറത്താകാതെ 5 പന്തിൽ നിന്നും 300 സ്ട്രൈക്ക് റേറ്റിൽ 15 റൺസ് നേടി. ശ്രീലങ്കയ്ക്കു വേണ്ടി മിഥാലി അയോധ‍്യ, ചമാരി അത്തപ്പത്തു, ചാമുഡി പ്രബോധ എന്നിവർ ഓരോ വിക്കറ്റ് വീഴ്ത്തി.

ആദ‍്യം ബാറ്റ് ചെയ്ത ഇന്ത‍്യയ്ക്ക് മികച്ച തുടക്കമാണ് ഓപ്പണർമാരായ സ്മൃതി മന്ഥനയും ഷഫാലി വർമയും നൽകിയത്. പവർപ്ലേ പൂർത്തിയാകുമ്പോൾ തന്നെ വിക്കറ്റ് നഷ്ടമില്ലാതെ 57 റൺസുണ്ടായിരുന്നു ടീമിന്. ഒന്നാം വിക്കറ്റിൽ കേവലം 30 പന്തിൽ നിന്നുമാണ് ടീം സ്കോർ 50തിലെത്തിയത്. 12.5 ഓവറിൽ 129 റൺസ് കൂട്ടുകെട്ടുണ്ടാക്കിയ ശേഷമാണ് ഷഫാലി വർമയുടെ വിക്കറ്റ് ടീമിന് നഷ്ടമാകുന്നത്.

തൊട്ടുപിന്നാലെ തന്നെ സ്മൃതിയും കളം വിട്ടതോടെ 2 വിക്കറ്റ് നഷ്ടത്തിൽ 132 റൺസെന്ന നിലയിലെത്തി ഇന്ത‍്യ. പിന്നീട് റിച്ചാ ഘോഷും ഹർമൻപ്രീതും ചേർന്ന് ഓരോ ബൗണ്ടറികൾ വീതം പറത്തി മത്സരം മുന്നോട്ടുകൊണ്ടുപോകാൻ ശ്രമിച്ചെങ്കിലും ടീം സ്കോർ 160 റൺസിലെത്തിയപ്പോൾ റിച്ച ഘോഷിനെ ചമാരി അത്തപ്പത്തു പുറത്താക്കിയത് ഇന്ത‍്യയ്ക്ക് തിരിച്ചടിയായി.

തൊട്ടുപിന്നാലെ ഹർമൻപ്രീതും പുറത്തായി. ദീപ്തി ശർമ റണ്ണൗട്ടാകുകയും ചെയ്തതോടെ ഇന്ത‍്യ 167 റൺസിലെത്തുകയായിരുന്നു. ഒടുവിൽ ഗുനാലൻ കമാലിനിയുടെ മിന്നൽ പ്രകടനത്തിന്‍റെ മികവിലാണ് ഇന്ത‍്യ 180 റൺസ് പിന്നിട്ടത്.

മറുപടി ബാറ്റിങ്ങിൽ ശ്രീലങ്കയ്ക്ക് ആദ്യ ഓവറിൽ തന്നെ ഓപ്പണർ ഇമേശ ദുലാനിയെ (4) നഷ്ടമായി. തുടർന്ന് ചമാരി അത്തപ്പത്തുവും (32 പന്തിൽ 36) വിഷ്മി ഗുണരത്നെയും (22 പന്തിൽ 20) സ്കോർ 62 വരെ എത്തിച്ചെങ്കിലും ആവശ്യമായ റൺ നിരക്ക് നിലനിർത്താൻ ഇന്ത്യൻ ബൗളർമാർ അനുവദിച്ചില്ല.

ലെഫ്റ്റ് ആം സ്പിന്നർ ശ്രീചരണി 20 റൺസ് വഴങ്ങി നാല് വിക്കറ്റ് വീഴ്ത്തിയപ്പോൾ ഓഫ് സ്പിന്നർ ദീപ്തി ശർമ 19 റൺസിന് മൂന്ന് വിക്കറ്റും സ്വന്തമാക്കി. ക്രാന്തി ഗൗഡ്, ഷഫാലി വർമ, പ്രേമ റാവത് എന്നിവർക്ക് ഓരോ വിക്കറ്റ്.