ന്യൂഡൽഹി: വൈദ്യുത ഇരുചക്ര വാഹനങ്ങള്‍ക്കുള്ള സബ്സിഡി കേന്ദ്രം അവസാനിപ്പിക്കാനൊരുങ്ങുകയാണെന്ന് റിപ്പോർട്ട്. അതായത് സര്‍ക്കാര്‍ എഫ്എഎംഇ III (ഫാസ്റ്റർ അഡോപ്‌ഷൻ ആൻഡ് മാനുഫാക്ച്ചറിങ് ഒഫ് ഇലക്‌ട്രിക് വെഹിക്കിൾസ്) സ്കീം പുറത്തിറക്കിയേക്കില്ല. പദ്ധതി തുടരുന്നതിനെക്കുറിച്ച് ധനമന്ത്രാലയം അടുത്തിടെ ആശങ്ക പ്രകടിപ്പിച്ചിരുന്നു. മറ്റ് വകുപ്പുകളും ഇപ്പോള് ഈ അഭിപ്രായത്തോട് യോജിച്ചതായാണ് പുറത്തുവരുന്ന റിപ്പോര്ട്ട്.
ജനങ്ങള്‍ക്കിടയിലേക്ക് വൈദ്യുത വാഹനങ്ങള്‍ വേഗത്തിലെത്തിക്കുന്നതിനാണ് കേന്ദ്രം സബ്സിഡി അനുവദിച്ചത്. സബ്സിഡി ലഭിച്ചതോടെ കൂടുതല്‍ ആളുകള്‍ വൈദ്യുത വാഹനങ്ങള്‍ വാങ്ങാന്‍ തുടങ്ങി. എന്നാല്‍ പിന്നീട് ഈ സബ്സിഡി സര്‍ക്കാര്‍ വെട്ടിക്കുറച്ചതോടെ വൈദ്യുത ഇരുചക്രവാഹനങ്ങളുടെ വില്‍പ്പനയില്‍ കുറച്ചുനാള്‍ ഇടിവുണ്ടായിരുന്നു. എന്നിരുന്നാലും അടുത്തിടെ ഇവയുടെ വില്‍പ്പന സ്ഥിരത കൈവരിച്ച് വരുകയായിരുന്നു. ഈ സാഹചര്യത്തിലാണ് വൈദ്യുത ഇരുചക്ര വാഹനങ്ങള്‍ക്കുള്ള സബ്സിഡി സര്‍ക്കാര്‍ നിര്ത്തലാക്കാനൊരുങ്ങുന്നത്. 2019 ഏപ്രില്‍ ഒന്നിന് ആരംഭിച്ച സബ്സിഡി 2024 മാര്‍ച്ച് 31ന് അവസാനിക്കും.
