ലുലു ഗ്രൂപ്പ് ഓഹരി ഉടമകൾക്ക് ലാഭവിഹിതം പ്രഖ്യാപിച്ചു

അബുദാബി: ലുലു ഗ്രൂപ്പ് ഓഹരി ഉടമകൾക്ക് 2025 സാമ്പത്തിക വർഷത്തിൽ 1627 കോടി രൂപയുടെ (723 മില്യൺ ദിർഹം) ലാഭവിഹിതം നൽകുമെന്ന് ലുലു റീട്ടെയ്ൽ ഹോൾഡിങ്സ് അറിയിച്ചു. രണ്ടാമത് വാർഷിക യോ​ഗത്തിലാണ് നിക്ഷേപകർക്കായി ലുലു ഗ്രൂപ്പ് ഈ പ്രഖ്യാപനം നടത്തിയത്.

അബുദാബിയിൽ ചേർന്ന വാർഷിക പൊതുയോഗമാണ് തീരുമാനം അം​ഗീകരിച്ചത്. 2025 സാമ്പത്തിക വർഷത്തിലെ അവസാന രണ്ട് പാദങ്ങളിലേതായി 923 കോടി രൂപയുടെ (361.5 മില്യൺ ദിർഹം) ലാഭവിഹിതം നൽകാനും തീരുമാനമായി.

ജിസിസിയിലെ വിപുലമായ പദ്ധതികളും, മികച്ച വിൽപ്പനനേട്ടവും, ഡിജിറ്റൽ ഇ കൊമേഴ്സ് രം​ഗത്തെ ഉയർന്ന വളർച്ചാനിരക്കും നേട്ടത്തിന് വേ​ഗം പകർന്നു. 2025 സാമ്പത്തിക വർഷത്തിൽ 7.9 ബില്യൺ ഡോളറിന്‍റെ വരുമാനം ലുലു ഗ്രൂപ്പ് നേടി.4.1 ശതമാനത്തിന്‍റെ വർദ്ധനയാണ് നേടിയത്.

​ദീർഘകാല അടിസ്ഥാനത്തിലുള്ള സുസ്ഥിരമായ വളർച്ചാനിരക്കും മികച്ച നിക്ഷേപക പങ്കാളിത്തവുമാണ് നേട്ടത്തിന് വേ​ഗതപകർന്നതെന്നും നിക്ഷപേകർക്ക് ഏറ്റവും മികച്ച നേട്ടം നൽകുമെന്നും ലുലു ​ഗ്രൂപ്പ് ചെയർമാൻ എം.എ. യൂസഫലി വ്യക്തമാക്കി.

കൂടുതൽ വിപുലമായ വികസന പദ്ധതികളാണ് ജിസിസിയിൽ ലുലു നടപ്പാക്കുന്നതെന്നും, ഡിജിറ്റൽ ഇ കൊമേഴ്സ് രം​ഗത്തും വലിയ മുന്നേറ്റമാണ് നടത്തുന്നതെന്നും അദേഹം പറഞ്ഞു. മേയ് 1 ആണ് ലുലു റീട്ടെയ്ൽ എക്സ്-ഡിവിഡന്‍റ് തീയതി. മേയ് 23ന് ലാഭവിഹിതം വിതരണം ചെയ്യും.