"ഓരോരുത്തർക്കും ഓരോന്നാണ് സ്പിരിച്വാലിറ്റി, എനിക്കത് ഒന്നുമില്ലായ്മയാണ്"; നടി സംയുക്ത വർമ

അടുത്തിടെ ആത്മീയതയെക്കുറിച്ച് നടി സംയുക്ത വർമ പറഞ്ഞ വാക്കുകളാണ് ഇപ്പോൾ സോഷ്യൽ മീഡിയയിൽ വൈറൽ. സ്പിരിച്വാലിറ്റി ഓരോരുത്തർക്കും ഓരോ പോലെയാണെന്നും തന്നെ സംബന്ധിച്ചിടത്തോളം സ്പിരിച്വാലിറ്റി എന്നത് ഒന്നുമില്ലായ്മയാണെന്നുമാണ് നടി പറഞ്ഞത്. ഐ ആം വിത്ത് ധന്യ വർമയ്ക്ക് നൽകിയ അഭിമുഖത്തിൽ സംസാരിക്കുകയായിരുന്നു സംയുക്ത.

"സ്പിരിച്വാലിറ്റി ഓരോരുത്തർക്കും ഓരോ പോലെയാണ്. ഞാൻ കാണുന്ന സ്പിരിച്വാലിറ്റി ഒന്നുമില്ലായ്മയാണ്. ഏറ്റവും വലിയ സ്വാതന്ത്ര്യം. ഇരുട്ട് ആണ് എനിക്ക് സ്പിരിച്വാലിറ്റി. ഒന്നുമില്ലാത്ത അവസ്ഥ, ശിവം എന്ന് പറയുന്ന ആ അവസ്ഥ. അതിനെയാണ് ഞാൻ സ്പിരിച്വാലിറ്റി ആയിട്ട് കണക്കാക്കുക.

എനിക്ക് നിയമങ്ങൾ ഇഷ്ടമല്ല. നിയമങ്ങളിൽ കെട്ടുപാടായി കിടക്കുന്നത് എനിക്കിഷ്ടമല്ല. ആ നിയമം എന്നൊക്കെ പറഞ്ഞു പോകുന്നത് ഒന്നും സ്പിരിച്വാലിറ്റി അല്ല. ശരിക്കും വെള്ളം ഒഴുകി പോകുന്നതു പോലെ പോകണം അതാണ് സ്പിരിച്വാലിറ്റി. അതിലേക്ക് ഞാൻ എത്തിയിട്ടുണ്ടോ എന്ന് എനിക്കറിയില്ല. അത്രയും സിംപിളായിട്ട് ഒന്നുമില്ലായ്മയിലേക്ക് നമ്മൾ കൂടി ചേരുന്നതാണ് സ്പിരിച്വാലിറ്റി." സംയുക്ത പറ‍യുന്നു.