"സൗജന്യ യാത്രക്കെത്തിയ 6 സുന്ദരികളെയും വിവാഹം കഴിച്ച് കെഎസ്ആർടിസി കണ്ടക്റ്റർ"; പ്രിയദർശിനി ബസ് യാത്ര സിനിമയാകുന്നു‍?

കെഎസ്ആർടിസി പ്രിയദർശിനി ബസിൽ‌ സ്ത്രീകൾക്ക് സൗജന്യ യാത്ര അനുവദിച്ച സംഭവത്തെ ആസ്പദമാക്കി സിനിമ ഒരുങ്ങുന്നു. ഇത്തരമൊരു ആശയവുമായി സന്തോഷ് പണ്ഡിറ്റാണ് രംഗത്തെത്തിയിരിക്കുന്നത്. ആനവണ്ടിയിലെ ആറു പെണ്ണുങ്ങൾ എന്നാണ് സിനിമയ്ക്ക് പേരു നൽകിയിരിക്കുന്നത്. സിനിമയുടെ കഥയടക്കമാണ് സന്തോഷ് പണ്ഡിറ്റ് ഫെയ്സ് ബുക്കിൽ പങ്കുവച്ചിരിക്കുന്നത്.

26 വയസുള്ള 6 യുവതികളുടെ കഥന കഥ ആണ് തീമെന്ന് അദ്ദേഹം കുറിപ്പിൽ പറയുന്നു. ഇവർ ഫ്രീ ടിക്കറ്റിൽ കേരളം മുഴുവൻ സഞ്ചരിക്കുന്നതാണ് കഥ. ഇതിൽ ഇവരെ സഹായിക്കുന്ന കെഎസ്ആർടിസി കണ്ടക്റ്ററാണ് നായകനായ സന്തോഷ് പണ്ഡിറ്റ്. അവസാനം ഈ 6 യുവതികളെയും നായകൻ കല്യാണം കഴിക്കുന്നു. ഇങ്ങനെയാണ് സിനിമാ കഥ മുന്നോട്ടു പോവുന്നത്...

ഫെയ്സ് ബുക്ക് കുറിപ്പ് ഇങ്ങനെ...

KSRTC പ്രിയദർശിനി ബസ്സിൽ സ്ത്രീകൾക്ക് free യാത്ര എന്ന തീം വെച്ചു ഒരു സിനിമ ചെയ്താലോ എന്നാ ചിന്തയിൽ ആണേ.. പേര് "ആനവണ്ടിയിലെ ആറു പെണ്ണുങ്ങൾ ". കഥ കേട്ട് നിങ്ങള്ക്ക് എല്ലാവർക്കും ഇഷ്ടപെട്ടാൽ ഞാൻ അഭിനയിച്ചു സംവിധാനം ചെയ്യാം. കഥ ന്നാ പിടിച്ചോ..

26 വയസ്സുള്ള 6 യുവതികളുടെ കഥന കഥ ആണ് തീം.

കാസർഗോഡ് ജില്ലയിലെ ഒരു ഉൾഗ്രാമത്തിൽ ഒരു കൂലി പണിക്കാരന്‍റെ മകൾ ആണ് പൂജാ കപൂർ. ഇവരുടെ facebook വഴി ജില്ലയിലെ മറ്റു വിവിധ ഭാഗങ്ങളിൽ ഉള്ള മറ്റു 5 യുവതികളും ഇവൾ ആയി ചങ്ക് ബന്ധം ഉണ്ടാകുന്നു.

പൂജ കപൂറിന്‍റെ ഭർത്താവ് ചെറിയ ജോലികൾ ചെയ്തു ജീവിക്കുന്ന ആനന്ദ് കപൂർ ആണ്. വീര്യം കൂടിയ മദ്യം കഴിച്ചു സ്ഥിരമായി ഭാര്യയെ തല്ലുന്നു. രണ്ടാമത്തെ നായിക ഒരു മേസ്തിരിയുടെ മകൾ ഐശ്വര്യ കപൂർ ആണ്. അവരുടെ ഭർത്താവ് വിനോദ് കപൂർ നിർമാണ തൊഴിലാളി ആണ്. സ്ഥിരമായി വീര്യം കുറഞ്ഞ മദ്യം കഴിച്ചു ഭാര്യയെ തല്ലുന്നു.

മൂന്നാമത്തെ ഇവരുടെ കൂട്ടുകാരി അഞ്ജലി കപൂർ ആണ്. അവളുടെ ഭർത്താവ് അത്യാവശ്യം കഞ്ചാവ് കടത്തു ആരും അറിയാതെ ചെയ്യുന്നു. ഓപ്പറേഷൻ തൂഫാനിൽ പിടിക്കപ്പെടുന്നു. നിലവിൽ ജയിലിൽ ആണ്.

നാലാമത്തെ യുവതി കൃഷിക്കാരന്‍റെ മകൾ രേഷ്മ ശർമ ആണ്. അവളുടെ ഭർത്താവ് ഒരു പഞ്ചായത്ത്‌ member ആയിരുന്നു. പക്ഷേ പഞ്ചായത്ത്‌ ഭരണ സമിതിയിൽ ഭരണ പ്രതിപക്ഷ വാക്കേറ്റം നടന്നപ്പോൾ അടിപിടി തടയുവാൻ മുന്നിട്ടിറങ്ങിയ സമാധാന പ്രിയൻ ആയ പങ്കജ് ശർമ യെ മറ്റൊരു പഞ്ചായത്ത് അംഗം കുത്തി കൊല്ലുന്നു. അങ്ങനെ രേഷ്മ വിധവ ആകുന്നു.

അഞ്ചാമത്തെ നായിക സ്വകാര്യ ബസ്സ് കണ്ടക്ടർ ആയ ദീപൻ ദാസ് പണ്ഡിറ്റ്‌ മകൾ സോനം ശർമ ആണ്. ഇവളുടെ ഭർത്താവ് സ്ത്രീധന പ്രശ്നം പറഞ്ഞു അവളെ സ്ഥിരമായി തല്ലുന്നു. ഒടുവിൽ 2 മക്കളെയും ഭർത്താവിന് തന്നെ നോക്കുവാൻ ഏല്പിച്ചു ഡിവോഴ്സ് ആയി സോനം വീട്ടിൽ എത്തുന്നു. ആറാമത്തെ നായിക മധുബാല പണ്ഡിറ്റ്‌ ഒരു പാവപ്പെട്ട വീട്ടിലെ ഏക മകൾ ആണ്. അവൾ അവിവാഹിത ആണ്. സീരിയലുകൾ കണ്ടു അമ്മായി അമ്മയെ പേടിച്ചു ഇനി ഒരിക്കലും വിവാഹം കഴിക്കില്ല എന്നു പ്രതിജ്ഞ എടുക്കുന്നു.

ജീവിതം മടുത്തു ഈ ആറു യുവതികളും KSRTC പ്രിയദർശിനി ബസ്സിൽ വെറുതെ ഒരു രസത്തിനു കാസർഗോഡ് നിന്നും തിരുവനന്തപുരം, കോവളം, മൂന്നാർ, ഗുരുവായൂർ, etc free ആയി സന്ദർശിക്കുവാൻ തീരുമാനിക്കുന്നു. ഇവരുടെ കൈയ്യിൽ പണവും ഇല്ല. ജീവിതത്തിൽ ആദ്യമായി ആണ് ഇവർ പരസ്പരം കാണുന്നത്. പെട്ടിയും ബാഗും എടുത്തു വീട്ടുകാരെ അവഗണിച്ചാണ് ഇവർ വരുന്നതും.

അങ്ങനെയാണ് സിനിമ തുടങ്ങുന്നത്. തിരുവനന്തപുരത്തെക്കു നേരിട്ട് പ്രിയദർശിനി ബസ്സില്ല എന്നും ഉള്ള ബസ്സൊക്കെ വലിയ ടിക്കറ്റ് ചാർജുള്ള super delux ആണെന്നും അറിഞ്ഞു 6 യുവതികളും വിഷമിക്കുന്നു. അപ്പോഴാണ് അവരുടെ മുന്നിൽ ഉത്തർ പ്രാദേശിൽ ബാല്യം ചിലവഴിച്ചു ഇയ്യിടെയായി കേരളത്തിൽ വന്നു കൂടിയ മനോഹർ പണ്ഡിറ്റ്‌ (ഇരുപത്തി ഒമ്പതര വയസ്സ് ) എത്തുന്നത്. ഈ റോൾ സന്തോഷ്‌ പണ്ഡിറ്റ്‌ ചെയ്യുന്നു. ഇയാൾ KSRTC യുടെ ഒരു ടിക്കറ്റ് ചെക്കിങ് ചെയ്യുന്ന ഇൻസ്‌പെക്ടർ ആണേ.

കൈയ്യിൽ 5 പൈസ ഇല്ലാതെ കേരളം മൊത്തം കറങ്ങുവാൻ വന്ന യുവതികൾക്ക് പണ്ഡിറ്റ്‌ ഒരുഗ്രൻ ഐഡിയ പറഞ്ഞു കൊടുക്കുന്നു. കാസർഗോഡ് നിന്നും ആദ്യം കാഞ്ഞങ്ങാട് ലേക്ക് പ്രിയദർശിനി ബസ്സിൽ പോവുക. അവിടെ കുറേ കറങ്ങി അടിക്കുക. അടുത്ത ദിവസം കണ്ണൂരിലേക്ക് ഓർഡിനറി ബസ്സിൽ പോവുക. അവിടെ കുറേ കറങ്ങുക. പിന്നെ തലശ്ശേരി, പിന്നേ കോഴിക്കോട്, പിന്നേ ഗുരുവായൂർ, പിന്നേ കൊടുങ്ങല്ലൂർ, പിന്നേ വൈറ്റില എറണാകുളം, പിന്നേ ചോറ്റാനിക്കര, പിന്നേ കോട്ടയം, കട്ടപ്പന, മൂന്നാർ, ഇടുക്കി, പിന്നേ പാലാ, പത്തനംതിട്ട, ആറ്റിങ്ങൽ, തിരുവനന്തപുരം,നെയ്യാറ്റിൻകര, കോവളം,നഗർകോവിൽ, etc ഇങ്ങനെ കട്ട്‌ ചെയ്ത് കട്ട്‌ ചെയ്ത് 15 ദിവസം എടുത്തു കേരളം മൊത്തം ചുറ്റുക. വരുന്ന വഴി ആലപ്പുഴ, തൃശൂർ, മലപ്പുറം വഴി പാലക്കാട്, പിന്നേ അവിടെ നിന്നുള്ള പ്രിയദർശിനി ബസ്സിൽ പൊള്ളാച്ചി, പളനി, കോയമ്പത്തൂർ വരെ free ആയി പോകുവാൻ നിർദേശിച്ചു. അവരെല്ലാം സന്തോഷത്തോടെ അത് പോലെ ചെയ്തു.

അവരോടുള്ള സ്നേഹം, പരിഗണന ഒക്കെ കാരണം പണ്ഡിറ്റ്‌ 15 ദിവസം ലീവ് എടുത്തു അവരെ സ്ഥലങ്ങളെല്ലാം കാണിച്ചു കൊടുക്കുന്നു. നല്ല AC റൂം ലോഡ്ജ് ഒക്കെ അവർക്കു free ആയി എടുത്തു കൊടുത്തു. 6 യുവതികൾക്കും നല്ല വെജിറ്റേറിയൻ ഭക്ഷണം വാങ്ങി കൊടുത്തു , പുതിയ വിലകൂടിയ അടിപൊളി വസ്ത്രം എല്ലാം വാങ്ങി കൊടുക്കുന്നു. എല്ലാ യുവതികളും വളരെ happy ആയി 5 പൈസ ചിലവില്ലാതെ കാസർഗോഡിൽ 15 ദിവസത്തിനു ശേഷം തിരിച്ചെത്തുന്നു. ഇതിൽ അവിവാഹിതയായ മധുബാല പണ്ഡിറ്റ്‌ മനസ്സ് കൊണ്ട് പണ്ഡിറ്റിനെ പ്രണയിക്കുന്നു. മറ്റുള്ള യുവതികൾക്കും "ഇങ്ങനെ ഒരു ഭർത്താവിനെ കിട്ടിയിരുന്നെങ്കിൽ..."എന്നാ ചിന്ത ഉണ്ടാകുന്നു.

യാത്ര കഴിഞ്ഞു തിരിച്ചു വന്ന യുവതികൾക്ക് വീട്ടിൽ കുറേ എതിർപ്പ് നേരിടേണ്ടി വരുന്നു. പൂജ കപൂറിന്‍റെയും, ഐശ്വര്യ കപൂറിന്‍റെയും മദ്യപാനികൾ ആയ ഭർത്താക്കന്മാർ വൃക്ക രോഗം ബാധിച്ചു പെട്ടെന്ന് മരിക്കുന്നു. അഞ്ജലി കപൂറിന്‍റെ കഞ്ചാവ് കേസിൽ പിടിക്കപ്പെട്ട ഭർത്താവ് ജയിലിൽ നല്ല ഭക്ഷണം ഒക്കെ കഴിച്ചു സുന്ദരൻ ആയി, ജയിലിൽ പണി എടുത്തപ്പോൾ കിട്ടിയ ലക്ഷങ്ങൾ ആയി പുറത്തി റങ്ങുന്നു. ഇതെല്ലാം കണ്ടു മറ്റൊരു യുവതി അങ്ങേരെ വളച്ചു കൊണ്ട് പോകുന്നു. പാവം അഞ്ജലി പിന്നീട് തൊഴിലുറപ്പ് ജോലിക്ക് പോയി അതി ദാരിദ്ര്യം മറികടക്കുവാൻ ശ്രമിക്കുന്നു.

അങ്ങനെ രണ്ടുകൊല്ലം കഴിഞ്ഞു.

Already ഡിവോഴ്സ്ഡ് ആയ സോനം ശർമ യെ പ്രൈവറ്റ് ബസ്സ് ജീവനക്കാരനായ അച്ഛനാണ് സംരക്ഷിച്ചിരുന്നത്. എന്നാൽ പ്രിയദർശിനി ബസ്സ് വന്നതോടെ സ്വകാര്യ ബസ് വ്യവസായം തകരുകയും, നിരവധി പ്രൈവറ്റ് ബസ്സുകൾ സർവീസ് നിറുത്തുകയും, അതിലെ തൊഴിലാളികൾക്ക് ജോലി നഷ്ടപെടുകയും ചെയ്യുന്നു. ഇങ്ങനെ സോനത്തിന്‍റെ അച്ഛനും ജോലി നഷ്ടപ്പെടുകയും, അങ്ങേരും ആ ബസ്സിലെ ഓണർ, ക്ലീനർ, ഡ്രൈവർ എല്ലാവരും ആ ബസ്സിൽ തൂങ്ങി മരിക്കുകയും ചെയ്യുന്നു. അച്ഛൻ കൂടി മരിച്ചതോടെ സോനം തകരുന്നു.

രണ്ടു കൊല്ലം ആയപ്പോഴേക്കും

KSRTC ക്കു വലിയ സാമ്പത്തിക ബാധ്യത വരുന്നു. സർക്കാരും അവരെ സഹായിച്ചു ബുദ്ധിമുട്ടുന്നു. കാര്യങ്ങൾ മുൻകൂട്ടി കണ്ടു മനോഹരൻ പണ്ഡിറ്റ്‌ ജോലി രാജി വെക്കുന്നു. ബംഗാളികളിൽ നാട്ടിൽ പോയ ഒഴിവിൽ, നിർമാണ മേഖലയിൽ ഒരു ജോലിക്കാരൻ ആയി പോകുന്നു. ദിവസവും 1000 രൂപ ഉണ്ടാക്കുന്നു. ഒരു ഓട്ടോറിക്ഷ വാങ്ങി രാത്രിയിൽ auto ഒടിച്ചും വരുമാനം ഉണ്ടാക്കുന്നു.

വിവാഹം ഒരിക്കലും കഴിക്കില്ല എന്ന തീരുമാനം മാറ്റി

മധുബാലയും പണ്ഡിറ്റും ഒന്നിക്കുവാൻ തീരുമാനിക്കുന്നു. സർക്കാർ ജോലി ഇല്ലാത്തതിനാൽ മധുബാല യുടെ വീട്ടുകാർ ഈ ബന്ധം എതിർക്കുന്നു. പക്ഷേ അവൾ ഒളിച്ചോടുന്നു. (ഇതിനിടയിൽ 8 ലവ് സോങ്‌സ് ഉണ്ടെ).. ഒടുവിൽ അവരുടെ വിവാഹം നടക്കുന്നു.

അതിനു ശേഷം വീണ്ടും പഴയത് പോലെ എല്ലാ കൂട്ടുകാരികളെയും കൂട്ടി മറ്റൊരു യാത്ര ഹണിമൂൺ ഭാഗമായി നടത്തുവാൻ മധുബാല പണ്ഡിറ്റ്‌ ആഗ്രഹിക്കുന്നു. ഇതുക്കെട്ട് കൂട്ടുകാരികൾ എല്ലാവരും റെഡി ആകുന്നു. പക്ഷേ മനോഹരൻ പണ്ഡിറ്റ്‌ ഒരേയൊരു നിബന്ധന വെക്കുന്നു.. "ഹണിമൂണിന് കേരളം മുഴുവൻ പോകുന്ന ആശയം നല്ലതാണ്. പക്ഷേ ഇതിനായി പ്രിയദർശിനി ബസ്സുകൾ മാത്രം തെരഞ്ഞെടുക്കേണ്ട.. പ്രൈവറ്റ് ബസ്സിൽ പോകാം. അവരും റോഡിൽ ഓടുന്നത് മാങ്ങ പറിക്കുവാൻ അല്ലല്ലോ? അവർക്കും ജീവിക്കേണ്ടേ? "

ഇതുക്കെട്ട് ഭർത്താവിന് വലിയ സാമ്പത്തിക നഷ്ടം വരുമോ എന്നോർത്തു ഭാര്യ ഓർമിപ്പിച്ചു "പക്ഷെ പണ്ഡിറ്റ്‌ ഏട്ടാ, 6 സ്ത്രീകൾക്ക് ടിക്കറ്റ് ചാർജ് വലിയ പൈസ ആകില്ലേ? നമ്മൾ അന്ന് പോയത് പോലെ കട്ട്‌ ചെയ്ത്, കട്ട്‌ ചെയ്ത് ഓർഡിനറി ബസ്സിൽ മാത്രം തിരുവനന്തപുരം പോയാൽ പോരെ..5 പൈസ ചിലവില്ല.. ചിന്തിക്കു.."

പണ്ഡിറ്റ്‌ ചിരിച്ചു കൊണ്ട് മറുപടി പറഞ്ഞു.. "Who cares?"

അങ്ങനെ പണ്ഡിറ്റും 6 യുവതികളും പ്രൈവറ്റ് ബസ്സിൽ രണ്ട് ആഴ്ച ഹണി മൂൺ ആഘോഷിക്കുവാൻ കേരളം മൊത്തം കറങ്ങി തിരിച്ചു വന്നു. എല്ലാവരും ഹാപ്പി ആയി..

സ്‌ക്രീനിൽ

"A film by Santhosh Pandit "

കഥ എങ്ങനെയുണ്ട്? Film ഹിറ്റ്‌ ആകുമോ? Pl reply..

By Santhosh Pandit (പണ്ഡിറ്റ്‌ പുലി അല്ല. പുലികളെ വേട്ടയാടുന്നവനാണ്.. The real Gold, among the rolled gold..പണ്ഡിറ്റിനെ പോലെ ആരുമില്ല )

Mob 99477 25911 (വാട്സ്ആപ്പ് മെസ്സേജ് മാത്രം )