ഉഡുപ്പി: ടി20 ലോകക്കപ്പ് ചാമ്പ്യൻഷിപ്പ് സ്വന്തമാക്കിയതിനു പിന്നാലെ കർണാടകയിലെ ഉഡുപ്പി ക്ഷേത്രത്തിൽ ദർശനം നടത്തി ക്രിക്കറ്റ് താരം സൂര്യകുമാർ യാദവ്. ഭാര്യ ദിവിഷ ഷെട്ടിയ്ക്കൊപ്പമാണ് കാപു മാരിഗുഡി ക്ഷേത്രത്തിൽ താരം ദർശനം നടത്തിയത്. തിങ്കളാഴ്ചയാണ് താരവും ഭാര്യയും മംഗളൂരുവിൽ എത്തിയത്. ഇരുവരുടെയും എട്ടാമത് വിവാഹ വാർഷികം വിമാനത്താവളത്തിൽ വച്ച് കേക്ക് മുറിച്ച് ആഘോഷിച്ചിരുന്നു. അതിനു ശേഷം ചൊവ്വാഴ്ചയാണ് ക്ഷേത്രത്തിലെത്തിയത്.
സൂര്യകുമാറിന്റെ ഭാര്യ ദിവിഷ ദക്ഷിണ കന്നഡ സ്വദേശിയാണ്. ഇന്ത്യൻ ടീം ലോകക്കപ്പ് നേടിയാൽ ഉഡുപ്പിയിലെ മാപു മാരിഗുഡി ക്ഷേത്രത്തിൽ ദർശനം നടത്തിയേക്കാമെന്ന് ദിവിഷ നേർന്നിരുന്നതായി ക്ഷേത്രം ഭാരവാഹികൾ പറയുന്നു.
കാപു മാരിയമ്മയ്ക്ക് മുല്ലമാല അർപ്പിച്ച് പ്രത്യേക പൂജയും നടത്തിയാണ് ഇരുവരും മടങ്ങിയത്.
