ലോകത്താകെയുള്ള വരയാടുകളിൽ പകുതിയും കേരളത്തിൽ

തിരുവനന്തപുരം: ലോകത്തൊട്ടാകെ 2668 വരയാടുകളുള്ളതിൽ 1365 എണ്ണം കേരളത്തിലാണുള്ളതെന്ന് സർവേ റിപ്പോർട്ട്. കേരളത്തിലെ ഇരവികുളം നാഷണൽ പാർക്കാണ് ഏറ്റവുമധികം വരയാടുകളുള്ള വന്യജീവി സങ്കേതം. റിപ്പോർട്ട് പ്രകാരം 841 വരയാടുകളാണ് ഇരവികുളത്തുള്ളത്. കേരളത്തിലെ വരയാടുകളിൽ 90 ശതമാനവും മൂന്നാർ ലാൻഡ്സ്‌കേപ്പിലാണ്. തമിഴ്നാട്ടിൽ മുക്കൂർത്തി നാഷണൽ പാർക്കിലും കേരളാ അതിർത്തിയോട് ചേർന്ന ഗ്രാസ്ഹിൽസ് നാഷണൽ പാർക്കിലുമാണ് ഏറ്റവുമധികം വരയാടുകളെ കണ്ടെത്തിയിട്ടുള്ളത്.

ഇരവികുളം നാഷണൽ പാർക്കിന്‍റെ 50ാം വാർഷികത്തിന്‍റെ ഭാഗമായി കേരളത്തിലെയും തമിഴ്നാട്ടിലെയും വനമേഖലകളിൽ നടത്തിയ വരയാടുകളുടെ സംയുക്ത കണക്കെടുപ്പ് റിപ്പോർട്ടിലാണ് ഈ വിവരങ്ങൾ. വനം മന്ത്രി എ.കെ. ശശീന്ദ്രൻ റിപ്പോർട്ട് പ്രകാശനം ചെയ്തു. റിപ്പോർട്ടിന്‍റെ തമിഴ്നാട്ടിലെ പ്രകാശന ചടങ്ങിനോടനുബന്ധിച്ച് വിഡിയൊ കോൺഫറൻസിങ്ങിലൂടെയാണ് കേരളം തയാറാക്കിയ റിപ്പോർട്ട് പ്രിൻസിപ്പൽ ചീഫ് കൺസർവേറ്റർ ഒഫ് ഫോറസ്റ്റ് രാജേഷ് രവീന്ദ്രന് നൽകി മന്ത്രി പ്രകാശനം നിർവഹിച്ചത്.

2025 ഏപ്രിലിൽ കേരളത്തിലെ 89 സെൻസസ് ബ്ലോക്കുകളിലും തമിഴ്നാട്ടിലെ 182 ബ്ലോക്കുകളിലുമായി സംരക്ഷിത വനമേഖലകൾക്കകത്തും പുറത്തുമുള്ള വരയാടുകളുടെ ആവാസവ്യവസ്ഥ നിലനിൽക്കുന്ന ഭൂഭാഗങ്ങളിൽ ഒരേ സമയം തുടർച്ചയായ നാല് ദിവസങ്ങളിലാണ് വരയാടുകളുടെ കണക്കെടുപ്പ് നടത്തിയത്. തിരുവനന്തപുരം മുതൽ വയനാട് വരെ വരയാടുകളുടെ സാന്നിധ്യമുള്ള കേരളത്തിലെ 19 വനം ഡിവിഷനുകളിലാണ് സെൻസസ് ബ്ലോക്കുകൾ നിശ്ചയിച്ചിരുന്നത്.

ശാസ്ത്രീയമായ ബൗണ്ടഡ് കൗണ്ട്, ഡബിൾ ഒബ്സർവർ കൗണ്ട് രീതികളിലൂടെയാണ് ദുർഘട പർവത മേഖലകളിലെ സെൻസസ് ബ്ലോക്കുകളിൽ നിന്നും വിശ്വാസ്യതയേറിയ കണക്കുകൾ ലഭ്യമാക്കിയത്. വരയാടുകളുടെ എണ്ണം ലഭ്യമാക്കുകയെന്നതിലുപരി അവയുടെ ഇപ്പോഴത്തെ ഭൂമേഖലാവിന്യാസവും അവ നേരിടുന്ന പാരിസ്ഥിതിക വെല്ലുവിളികളും മനസിലാക്കുകയും ക്യാമറാ ട്രാപ്പുകളുപയോഗിച്ച് കൂടുതൽ കൃത്യതയുള്ള വിവരങ്ങൾ ലഭ്യമാക്കുകയുമായിരുന്നു ഇത്തവണത്തെ ലക്ഷ്യം.

ചരിത്രപരമായി, പശ്ചിമഘട്ട മലനിരകളിൽ വലിയൊരു മേഖലയിലെമ്പാടും കാണപ്പെട്ടിരുന്ന വരയാടുകളിൽ നല്ലൊരു ഭാഗവും തോട്ടങ്ങളുടെ ആവിർഭാവവും നിർമാണ പ്രവർത്തനങ്ങളും ഭൂവിനിയോഗ രീതികളിൽ വന്ന മാറ്റങ്ങളും കാരണം പിൽക്കാലത്ത് അപ്രത്യക്ഷമായിട്ടുണ്ട്. വരയാടുകൾ മുൻപ് കാണപ്പെട്ടിരുന്ന ഇത്തരം മേഖലകളിൽ ഇപ്പോൾ അവയുടെ സാന്നിധ്യമുണ്ടോ എന്നറിയുന്നതിനും ഒറ്റപ്പെട്ട വരയാട് ആവാസവ്യവസ്ഥകളെ കണ്ടെത്തി, അവയ്ക്ക് സമീപ ആവാസവ്യവസ്ഥകളുമായുണ്ടായിരുന്ന തുടർച്ച പുനസ്ഥാപിക്കുന്നതിനും ആവശ്യമായ വിവരങ്ങൾ ലഭ്യമാക്കുന്നതിനും ഈ സർവെ സഹായിച്ചിട്ടുണ്ട്.