ലക്നൗ: വിവാഹവേദിയിലേക്ക് പുലി കടന്നു കയറിയതോടെ പരിഭ്രാന്തരായി നാട്ടുകാർ. ഉത്തർപ്രദേശിലെ ലക്നൗവിലാണ് സംഭവം. ബുദ്ധേശ്വർ റോഡ് പരിസരത്തു നടന്ന വിവാഹാഘോഷത്തിനിടെ അപ്രതീക്ഷിതമായി ഹാളിലേക്ക് പുലി കയറിവരുകയായിരുന്നു. അതിഥികൾക്കൊപ്പം വരനും വധുവും പോലും ജീവൻ രക്ഷിക്കാനായി ഇറങ്ങിയോടി. ഹാളിനു പുറത്ത് നിർത്തിയിരുന്ന കാറിനുള്ളിലാണ് വധൂവരന്മാർ ഓടിക്കയറിയത്.
വിവരമറിഞ്ഞ ഉടൻ പൊലീസും വനംവകുപ്പും സ്ഥത്തെത്തി. മണിക്കൂറുകളോളം നീണ്ട ശ്രമങ്ങൾക്കൊടുവിൽ വ്യാഴാഴ്ച പുലർച്ചെ 2 മണിയോടെയാണ് പുലിയെ പിടികൂടാൻ ആയത്. പുലിയെ പിടിക്കാൻ ശ്രമിക്കുന്നതിനിടെ വനംവകുപ്പ് ഉദ്യോഗസ്ഥന് പരുക്കേറ്റിട്ടുണ്ട്.
പിടി കൂടാൻ ശ്രമിക്കുന്നതിനിടെ പുലി ആക്രമിക്കുവാൻ ശ്രമിക്കുന്ന വീഡിയോകൾ പുറത്തു വന്നിട്ടുണ്ട്. ഹാളിനു പുറത്തു നിർത്തിയിട്ടിരുന്ന വാഹനങ്ങളിൽ ഇരുന്നാണ് വിവാഹം കൂടാനെത്തിയവരെല്ലാം ജീവൻ രക്ഷിച്ചത്.
