വീട്ടിൽ ഉറങ്ങിക്കിടന്ന ദമ്പതികൾ ഷോക്കേറ്റു മരിച്ചു
ആഗ്ര: വീട്ടിനകത്ത് ഉറങ്ങുകയായിരുന്ന ദമ്പതികൾക്ക് വൈദ്യുതാഘാതമേറ്റു ദാരുണാന്ത്യം. ഒപ്പമുണ്ടായിരുന്ന ഇവരുടെ നാലു കുട്ടികൾ അത്ഭുതകരമായി രക്ഷപ്പെട്ടു. ഉത്തർപ്രദേശിലെ ആഗ്രയിൽ ശനിയാഴ്ച രാത്രിയാണ് സംഭവം.
ജഗദീഷ് (40), ഭാര്യ ശാഷി (35) എന്നിവരാണ് മരിച്ചത്. വീട്ടിനകത്തെ മുറിയിൽ കുട്ടികൾക്കൊപ്പം ഇരുവരും ഉറങ്ങവേയാണ് വൈദ്യുതാഘാതമേറ്റത്. പലവ്യജ്ഞന കട നടത്തുന്ന ജഗദീഷ് രാത്രി 11നാണ് വീട്ടിൽ എത്തിയത്. തുടർന്ന് ഭാര്യയ്ക്കും മക്കൾക്കൊപ്പം മുറിയിൽ കിടന്നുറങ്ങിയപ്പോഴാണ് അപകടമുണ്ടായത്. മുറിയിലുണ്ടായിരുന്ന ഇസ്തിരി പെട്ടിയിലേക്ക് ഇലക്ട്രിക് വയർ പൊട്ടിവീഴുകയും അതിൽ നിന്ന് ദമ്പതികൾക്ക് ഷോക്കേൽക്കുകയും ചെയ്തെന്നാണ് പൊലീസിന്റെ പ്രാഥമിക നിഗമനം.
ദമ്പതികളിൽ നിന്ന് അൽപ്പം മാറിക്കിടന്നതിൽ കുട്ടികൾ ഷോക്കേൽക്കാതെ രക്ഷപ്പെടുകയായിരുന്നു. വിവരമറിഞ്ഞ് പൊലീസ് സ്ഥലത്തെത്തി മൃതദേഹങ്ങൾ പോസ്റ്റുമോർട്ടത്തിനായി ആശുപത്രിയിലേക്ക് മാറ്റി. ഷംഷാബാദ് പൊലീസ് കേസെടുത്തു.
