ബന്ദി സായ് ഭഗീരഥ്
ഹൈദരാബാദ്: കേന്ദ്രമന്ത്രി സഞ്ജയ് കുമാറിന്റെ മകൻ ബന്ദി സായ് ഭഗീരഥിനെതിരേ ലുക്ക് ഔട്ട് നോട്ടീസ് പുറപ്പെടുവിച്ചു. പ്രായപൂർത്തിയാകാത്ത പെൺകുട്ടിയെ ലൈംഗികമായി പീഡിപ്പിച്ചെന്ന കേസിലാണ് നടപടി.
ഇയാളെ കണ്ടെത്താനായി പൊലീസ് തെരച്ചിൽ നടത്തുകയാണെന്ന് വാർത്താ ഏജൻസിയായ പിടിഐ റിപ്പോർട്ട് ചെയ്തു. പ്രതി രാജ്യം വിടുന്നത് തടയാനാണ് ലുക്ക് ഔട്ട് നോട്ടീസ് പുറത്തിറക്കിയിരിക്കുന്നത്.
മേയ് 8നാണ് ബന്ദി സായ് ഭഗീരഥിനെതിരേ 17 കാരിയായ പെൺകുട്ടിയുടെ അമ്മ നൽകിയ പരാതിയിൽ കേസ് രജിസ്റ്റർ ചെയ്യുന്നത്. ഭഗീരഥിന് തന്റെ മകളുമായി ബന്ധമുണ്ടെന്നും ലൈംഗികമായി പീഡിപ്പിച്ചെന്നായിരുന്നു പരാതിയിൽ ആരോപിച്ചിരുന്നത്. പെൺകുട്ടിക്കും കുടുംബത്തിനുമെതിരേ ഭഗീരഥും പരാതി നൽകിയിരുന്നു.
തന്നെ കുടുംബ പരിപാടികളിലേക്ക് പെൺകുട്ടി ക്ഷണിച്ചിരുന്നുവെന്നും പിന്നീട് പെൺകുട്ടിയുടെ മാതാപിതാക്കൾ വിവാഹം കഴിക്കാൻ സമ്മർദം ചെലുത്തിയെന്നും നിരസിച്ചപ്പോൾ മാതാപിതാക്കൾ പണം വാഗ്ദാനം ചെയ്തെന്നും അനുസരിച്ചില്ലെങ്കിൽ വ്യാജ പരാതികൾ നൽകുമെന്ന് ഭീഷണിപ്പെടുത്തിയെന്നും ഭഗീരഥ് പറയുന്നു.
