കാർഗോയിൽ ഒളിപ്പിച്ച 3.5 ദശലക്ഷത്തിലധികം കള്ളക്കടത്ത് വസ്തുക്കൾ പിടിച്ചെടുത്തു

ദുബായ്: ദുബായിലെ ഒരു സ്ഥാപനത്തിൽ ഫെഡറൽ ടാക്സ് അതോറിറ്റി നടത്തിയ പരിശോധനയിൽ 3.5 ദശലക്ഷത്തിലധികം അനധികൃതവും നിയമവിരുദ്ധവുമായ എക്സൈസ് സാധനങ്ങൾ പിടിച്ചെടുത്തു. കയറ്റുമതി ചെയ്യുന്നതിനുള്ള വസ്ത്രങ്ങളിലും പാദരക്ഷകളിലും ഒളിപ്പിച്ച വ്യാജ പുകയില, പാനീയ ഉൽപ്പന്നങ്ങൾ എന്നിവ എഫ്‌ടി‌എ ഉദ്യോഗസ്ഥർ നടത്തിയ പരിശോധനയിൽ കണ്ടെത്തി. ഈ ഇനങ്ങൾക്ക് നൽകേണ്ട ആകെ നികുതി 133.2 ദശലക്ഷം ദിർഹമാണെന്ന് കണക്കാക്കുന്നു. എല്ലാ നിയമവിരുദ്ധ സാധനങ്ങളും കണ്ടുകെട്ടിയിട്ടുണ്ടെന്നും നിയമം ലംഘിച്ച സ്ഥാപനങ്ങൾക്കെതിരെ പിഴ ചുമത്തിയിട്ടുണ്ടെന്നും എഫ്‌ടി‌എ സ്ഥിരീകരിച്ചു. ഇത്തരം സ്ഥാപനങ്ങൾക്കെതിരെ നിയമനടപടികളും സ്വീകരിച്ചിട്ടുണ്ട്.

കണ്ടുകെട്ടിയ സാധനങ്ങൾ

• 1.56 ദശലക്ഷം പായ്ക്ക് സിഗരറ്റുകൾ

• 1.77 ദശലക്ഷം പായ്ക്ക് ഇലക്ട്രോണിക് പുകവലി ഉപകരണങ്ങളും അനുബന്ധ സാമഗ്രികളും

• 111,360 പായ്ക്ക് അസംസ്കൃത പുകയില

• 4,000 പായ്ക്ക് ഹുക്ക പുകയില

• 121 പായ്ക്ക് നിക്കോട്ടിൻ പൗച്ചുകൾ

• 4,600 പായ്ക്ക് എക്സൈസ് പാനീയങ്ങൾ

എക്സൈസ് സാധനങ്ങളുടെ ഉത്പാദകർ, ഇറക്കുമതിക്കാർ, സ്റ്റോക്കിസ്റ്റുകൾ എന്നിവർ എക്സൈസ് നികുതിയും അതിന്‍റെ ഭേദഗതികളും സംബന്ധിച്ച 2017 ലെ ഫെഡറൽ നിയമം നമ്പർ 7 ൽ പറഞ്ഞിരിക്കുന്ന നികുതി ചട്ടങ്ങൾ പാലിക്കണമെന്ന് ഫെഡറൽ അധികാരികൾ ആവശ്യപ്പെട്ടു.

അന്താരാഷ്ട്ര രീതികൾക്ക് അനുസൃതമായി, നികുതി വെട്ടിപ്പ് തടയുന്നതിന് പുകയിലയിലും പുകയില ഉൽപ്പന്നങ്ങളിലും ഡിജിറ്റൽ നികുതി സ്റ്റാമ്പുകൾ പ്രയോഗിക്കുന്നത് ഉൾപ്പെടെയുള്ള ഏറ്റവും പുതിയ ഇലക്ട്രോണിക് നിയന്ത്രണ സംവിധാനങ്ങൾ ഉപയോഗിക്കുന്നുണ്ടെന്ന് എഫ് ടി എ വ്യക്തമാക്കി.