സീറ്റ് ബെൽറ്റ് ധരിച്ചില്ല, ക്യാൻസർ രോഗിക്ക് 18,000 രൂപ പിഴ; ഒന്നിച്ചടയ്ക്കണമെന്ന് എംവിഡി

കോഴിക്കോട്: സീറ്റ് ബെൽറ്റ് ധരിക്കാതെ യാത്ര ചെയ്തതിന്‍റെ പേരിൽ അറുപതുകാരന് 18,000 രൂപ പിഴയിട്ട് മോട്ടോർ വെഹിക്കിൾ ഡിപ്പാർട്മെന്‍റ്. നിയമലംഘനം എഐ ക്യാമറയിൽ പതിഞ്ഞതിനെത്തുടർന്നാണ് 500 രൂപ വീതം 36 തവണയാണ് പിഴ ഇട്ടിരിക്കുന്നത്. ഫാറൂഖ് കോളെജ് സ്വദേശി കാരാട് പറമ്പ് പന്നിക്കോട്ടിൽ പി.കെ. ജയനോട് ഒന്നിച്ച് 18,000 രൂപയടക്കാൻ എംവിഡി ആവശ്യപ്പെട്ടിരിക്കുന്നത്.

എന്നാൽ തനിക്ക് പിഴയുമായി ബന്ധപ്പെട്ട് വിവരമൊന്നും ലഭിച്ചിരുന്നില്ലെന്നും ഒന്നിച്ച് ഇത്രയും തുക അടയ്ക്കാൻ ആകില്ലെന്നും ജയൻ പറയുന്നു.

അർബുദം ബാധിച്ചതിനെത്തുടർന്ന് ചികിത്സയ്ക്കായാണ് ജയൻ സ്വകാര്യ വാഹനത്തിൽ പതിവായി ആശുപത്രിയിൽ പോയി വന്നിരുന്നത്. കഴിഞ്ഞ 10 വർഷമായി ജോലിയില്ലാതെ കഴിയുന്നതിനാൽ ഇളവ് വേണമെന്നാണ് ആവശ്യം.