അതിതീവ്ര മഴ; 3 ജില്ലകളിൽ റെഡ് അലർട്ട്, മലയോര മേഖലയിൽ രാത്രിയാത്രാ നിരോധനം

തിരുവനന്തപുരം: സംസ്ഥാനത്ത് മഴ ശക്തിയാർജിച്ച സാഹചര്യത്തിൽ മൂന്നു ജില്ലകളിൽ റെഡ് അലർട്ട് പ്രഖ്യാപിച്ച് കാലാവസ്ഥാ വകുപ്പ്. ഇടുക്കി, എറണാകുളം, തൃശൂർ ജില്ലകളിലാണ് റെഡ് അലർട്ട്. കാലവർഷക്കാറ്റ് മണിക്കൂറിൽ 80 കിലോമീറ്റർ വേഗം കൈവരിച്ചതിനാൽ മഴ ഇനിയും കനക്കുമെന്നാണ് റിപ്പോർട്ടുകൾ സൂചിപ്പിക്കുന്നത്. പത്തനംതിട്ട, കോട്ടയം, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർഗോഡ് ജില്ലകളിൽ ഓറഞ്ച് അലർട്ട് പ്രഖ്യാപിച്ചിട്ടുണ്ട്.

സംസ്ഥാനത്ത് അങ്ങോളമിങ്ങോളം കനത്ത മഴയിൽ വ്യാപകമായ നാശനഷ്ടങ്ങളാണ് റിപ്പോർട്ട് ചെയ്തിരിക്കുന്നത്. പെരിയാർ നിറഞ്ഞൊഴുകുകയാണെങ്കിലും നിലവിൽ അപകടഭീഷണിയില്ല. അട്ടപ്പാടി ചുരം ഉൾപ്പെടെ വിവിധ റോഡുകളിൽ മരം വീണ് ഗതാഗതം തടസപ്പെട്ടു. വയനാട്ടിലും ഇടുക്കിയിലും മഴ ശക്തമാണ്. മലയോരമേഖലകളിൽ രാത്രിയാത്ര നിരോധിച്ചിട്ടുണ്ട്. ആലപ്പുഴയിൽ കടലാക്രമണമവും രൂക്ഷമാണ്.

സംസ്ഥാനത്ത് ശനി, ഞായർ ദിവസങ്ങളിൽ 50 മുതൽ 60 കിലോമീറ്റർ വരെ വേഗതയിലും തിങ്കൾ, ചൊവ്വാ ദിവസങ്ങളിൽ 40 മുതൽ 50 കിലോമീറ്റർ വരെ വേഗതയിൽ ശക്തമായ കാറ്റിന് സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.