പത്തനംതിട്ട: റാന്നിയിൽ ഒറ്റയ്ക്ക് താമസിക്കുകയായിരുന്ന വീട്ടമ്മയെ കൊവിഡ് ബൂസ്റ്റർ ഡോസെന്ന് തെറ്റിദ്ധരിപ്പിച്ച് കുത്തിവയ്പ്പെടുത്തതിന് പൊലീസ് അറസ്റ്റു ചെയ്ത യുവാവിനെ കോടതി ജാമ്യത്തിൽ വിട്ടു. പത്തനംതിട്ട സ്വദേശിയായ ആകാശിനെയാണ് റാന്നി ഒന്നാം ക്ലാസ് മജിസ്ട്രേറ്റ് ജാമ്യത്തിൽ വിട്ടത്.
ഉതിമൂട് വലിയ കലുങ്ക് സ്വദേശിനിയായ ചിന്നമ്മ (66) യ്ക്കാണ് ആകാശ് വീട്ടിലെത്തി കുത്തിവയ്പ്പെടുത്തത്. ചിന്നമ്മയ്ക്ക് പരാതിയില്ലെന്ന് അറിയിച്ചതോടെയാണ് കോടതി ജാമ്യത്തിൽ വിട്ടത്.
സിറിഞ്ചിൽ മരുന്നോ വെള്ളമോ ഒന്നും ഉണ്ടായിരുന്നില്ലെന്ന് പൊലീസ് കണ്ടെത്തിയിരുന്നു. കൊവിഡ് കാലത്ത് വാക്സിനെടുത്തപ്പോൾ മുതൽ ആർക്കെങ്കിലും കുത്തിവയ്പ്പെടുക്കണമെന്ന ആകാശിന്‍റെ ആഗ്രഹമാണ് ഇതിന് പ്രേരിപ്പിച്ചതെന്നും പൊലീസ് പറഞ്ഞു.
