വൈദ്യുതി നിയന്ത്രണം തിങ്കളാഴ്ച വരെ തുടരും

തിരുവനന്തപുരം: പവർഗ്രിഡ് കോർപ്പറേഷൻ സബ് സ്റ്റേഷനിലുണ്ടായ സാങ്കേതിക തകരാറിനെത്തുടർന്ന് വടക്കൻ കേരളത്തിലെ നാല് ജില്ലകളിൽ ഏർപ്പെടുത്തിയിട്ടുള്ള ഭാഗിക വൈദ്യുതി നിയന്ത്രണം മേയ് 25 വരെ തുടരാൻ സാധ്യതയെന്ന് കെഎസ്ഇബി. കോഴിക്കോട്, വയനാട്, കണ്ണൂർ, കാസർഗോഡ് ജില്ലകളിലാണ് വൈദ്യുതി തടസപ്പെടാൻ സാധ്യതയുള്ളത്.

കോഴിക്കോട് 400 കെവി സബ്സ്റ്റേഷനിലെ മൂന്നാം നമ്പർ 500 എംവിഎ ട്രാൻസ്ഫോർമറിന്‍റെ 220 കെവി ബുഷിങ്ങിലുണ്ടായ തകരാറാണ് പ്രതിസന്ധിക്കു കാരണം. നേരത്തെ മേയ് 12 മുതൽ ഒരാഴ്ചയ്ക്കുള്ളിൽ അറ്റകുറ്റപ്പണികൾ പൂർത്തിയാകുമെന്നാണ് പവർഗ്രിഡ് കോർപ്പറേഷൻ അറിയിച്ചിരുന്നത്. എന്നാൽ, ജോലികൾ പൂർത്തിയാക്കാൻ മേയ് 25 വരെ സമയം ആവശ്യമാണെന്ന് പിജിസിഐഎൽ ഇപ്പോൾ അറിയിച്ച സാഹചര്യത്തിലാണ് നിയന്ത്രണം നീളുന്നത്.

അറ്റകുറ്റപ്പണികൾ നടക്കുന്ന ദിവസങ്ങളിൽ പീക്ക് സമയങ്ങളിൽ (വൈകുന്നേരങ്ങളിൽ) ഉൾപ്പെടെ ഭാഗികമായ നിയന്ത്രണം ഉണ്ടായേക്കും. അതിനാൽ ഉപയോക്താക്കൾ വൈദ്യുതി ഉപയോഗത്തിൽ മിതത്വം പാലിക്കണമെന്നും സഹകരിക്കണമെന്നും കെഎസ്ഇബി അധികൃതർ അഭ്യർഥിച്ചു.