ആലപ്പുഴ: കർഷകരിൽ നിന്നു നെല്ലു ഏറ്റെടുക്കുമ്പോൾ തന്നെ വില നൽകാൻ സർക്കാർ തയാറാവണമെന്ന് രമേശ് ചെന്നിത്തല. തകഴി കുന്നുമ്മയിൽ ബാങ്ക് വായ്പ ലഭിക്കാത്തതിനെ തുടർന്ന് ജീവനൊടുക്കിയ പ്രസാദിന്റെ വീടു സന്ദർശിച്ച ശേഷം പ്രതികരിക്കുകയായിരുന്നു അദ്ദേഹം.
നെല്ല് സംഭരിക്കുമ്പോൾ പിആർഎസ് വഴി വില നൽകുന്ന രീതി ഉപേക്ഷിക്കണം. ഓസ്ട്രേലിയയിൽ ഇരുന്നു കൃഷിമന്ത്രി പ്രസ്താവന ഇറക്കി കേരളത്തിലെ കർഷകരെ അപമാനിക്കരുത്. . കുറ്റം പ്രസാദിന്റെ തലയിൽ കെട്ടിവെയ്ക്കാനുള്ള ശ്രമം ഉപേക്ഷിക്കണം. സിവിൽ സപ്ലൈഡ് മന്ത്രിയും ജനങ്ങളെ തെറ്റിദ്ധരിപ്പിക്കാനാണു ശ്രമിക്കുന്നത്. മന്ത്രിമാർ പ്രസാദിന്റെ വീടു സന്ദർശിച്ച് സഹായം പ്രഖ്യാപിക്കണം. കുടുംബത്തിലെ ഒരാൾക്കെങ്കിലും ജോലി നൽകണമെന്നും അദ്ദേഹം പറഞ്ഞു.
