തിരുവല്ലയിൽ ടൂറിസ്റ്റ് ബസ് മറിഞ്ഞു; 5 പേർക്ക് പരുക്ക്
തിരുവല്ല: തമിഴ്നാട് സ്വദേശികൾ സഞ്ചരിച്ചിരുന്ന ടൂറിസ്റ്റ് ബസ് മറിഞ്ഞുണ്ടായ അപകടത്തിൽ അഞ്ച് പേർക്ക് പരുക്ക്. വ്യാഴാഴ്ച പുലർച്ചേ തിരുവല്ല തുകലശേരിയിൽ വച്ചാണ് അപകടം നടന്നത്. ചെങ്ങന്നൂർ ഭാഗത്തു നിന്ന ബസ് നിയന്ത്രണം നഷ്ടപ്പെട്ട് വൈദ്യുത പോസ്റ്റുകളും മതിലും ഇടിച്ചു തകർത്ത ശേഷം തല കീഴായി മറിയുകയായിരുന്നു.
തിരുനെൽവേലിയിലെ മാവട്ടം കൂട്ടപ്പുളി സ്വദേശികളാണ് വണ്ടിയിൽ ഉണ്ടായിരുന്നത്. എടത്വ പള്ളിയിലേക്ക് തീർഥാടനം നടത്തുകയായിരുന്നു സംഘം.ബസ് ഡ്രൈവർ അശോക് (42), ജോൺ (7), നിഖിൽ ആന്റണി (13), ആൽബർട്ട് ജൂഡ് (49), സ്റ്റെഫി (23) എന്നിവർക്കാണ് പരുക്കേറ്റത്.
ഇവരെ തിരുവല്ല പുഷ്പഗിരി ആശുപത്രിയിൽ താലൂക്ക് ആശുപത്രിയിലും പ്രവേശിപ്പിച്ചു. ഡ്രൈവർ ഉറങ്ങിപ്പോയതാകാം അപകടകാരണം എന്നാണ് പൊലീസിന്റെ നിഗമനം.
