കെഎസ്ആർടിസി ബസ് ഇലക്ട്രിക് പോസ്റ്റിൽ ഇടിച്ചു; ആളപായമില്ല
കോതമംഗലം: കൊച്ചി- ധനുഷ്കോടി ദേശീയ പാതയിൽ കുത്തുകുഴി പള്ളിത്താഴത്തിന് സമീപം നിയന്ത്രണം വിട്ട കെഎസ്ആർടിസി ബസ് ഇലക്ട്രിക് പോസ്റ്റിലിടിച്ച് അപകടം. ശക്തമായ മഴയെത്തുടർന്ന് റോഡിൽ വഴുക്കലുണ്ടായതിനിടയിൽ, അമിതവേഗതയിലെത്തിയ ബസ് പെട്ടെന്ന് ബ്രേക്ക് ചെയ്തതോടെ നിയന്ത്രണം നഷ്ടമായി പോസ്റ്റിലിടിച്ച് റോഡിന് കുറുക്കെ വട്ടം തിരിയുകയായിരുന്നു.
ഇടിയുടെ ആഘാതത്തിൽ തകർന്ന ഇലക്ട്രിക് പോസ്റ്റ് നിലവിൽ കെഎസ്ആർടിസി ബസിന് മുകളിലാണ് തങ്ങിനിൽക്കുന്നത്. അപകടത്തിൽ ആർക്കും പരിക്കില്ല. എന്നാൽ, അപകടത്തെത്തുടർന്ന് ദേശീയ പാതയിൽ വൻ ഗതാഗതക്കുരുക്ക് അനുഭവപ്പെട്ടു.
