ന്യൂഡൽഹി: ഒമ്പതു വർഷത്തിനിടെ രാജ്യത്ത് പുതുതായി പാചകവാതക (എൽപിജി) കണക്ഷൻ എടുത്തത് 17 കോടി പേർ. രാജ്യത്തെയാകെ എൽപിജി ഉപയോക്താക്കളുടെ എണ്ണം ഇതോടെ 31.26 കോടിയായി. 2014ൽ 14.52 കോടിയായിരുന്ന എൽപിജി ഉപയോക്താക്കളുടെ എണ്ണമാണ് ഇരട്ടിയിലേറെയായി കുതിച്ചുയർന്നത്.
കേന്ദ്ര പെട്രോളിയം മന്ത്രാലയമാണു പാചകവാതക ഉപയോഗത്തിലുണ്ടായ വർധനയുടെ വിവരങ്ങൾ പുറത്തുവിട്ടത്. പ്രധാനമന്ത്രി ഉജ്വല യോജന പദ്ധതിയാണ് എൽപിജി ഉപയോഗത്തിലെ വർധനയ്ക്ക് വഴിയൊരുക്കിയത്. പുതിയ കണക്ഷനു വേണ്ടി നീണ്ട കാത്തിരിപ്പും പുതിയ സിലിണ്ടറിനുവേണ്ടി ഏഴു മുതൽ പത്തുവരെ ദിവസത്തെ കാത്തിരിപ്പും വേണ്ട കാലത്തിൽ നിന്ന് അപേക്ഷിച്ചാലുടൻ കണക്ഷനും 24 മണിക്കൂറിനുള്ളിൽ പുതിയ സിലിണ്ടറും ലഭിക്കുന്ന അവസ്ഥയിലേക്കു മാറിയെന്നും മന്ത്രാലയം പറയുന്നു.
14.2 കിലോഗ്രാമിന്റെ പതിവു സിലിണ്ടറുകൾക്കു പുറമേ കുറഞ്ഞ ആവശ്യം മാത്രമുള്ളവരെയും കുറഞ്ഞ വരുമാനക്കാരെയും ലക്ഷ്യമിട്ട് അഞ്ചു കിലോഗ്രാമിന്റെ സിലിണ്ടറുകളും പൊതുമേഖലാ ഇന്ധന കമ്പനികൾ പുറത്തിറക്കി. 2016 മേയ് ഒന്നിനാണു പ്രധാനമന്ത്രി ഉജ്വല യോജന ആരംഭിച്ചത്. മുഴുവൻ പാവപ്പെട്ട കുടുംബങ്ങൾക്കും സൗജന്യമായി എൽപിജി കണക്ഷൻ ഉറപ്പാക്കുന്നതായിരുന്നു പദ്ധതി. 2023 ജനുവരി 30 വരെയുള്ള കണക്കുപ്രകാരം ഉജ്വല യോജനയിൽ 9.58 കോടി കണക്ഷനുകൾ നൽകിയെന്നും മന്ത്രാലയം. ഉജ്വല യോജനയ്ക്കു കീഴിലുള്ള ഉപയോക്താക്കൾക്ക് വർഷം 12 സിലിണ്ടറുകൾക്ക് 200 രൂപ വീതം സബ്സിഡി അനുവദിച്ചിട്ടുണ്ട്. വിറക് ശേഖരിക്കാനും പാചകത്തിനുമായി ദിവസത്തിന്റെ നല്ലൊരു ഭാഗം സമയവും ചെലവഴിച്ചിരുന്ന സ്ത്രീകളെയും കുട്ടികളെയും അടുക്കളയിൽ നിന്നു മോചിപ്പിച്ചതാണ് ഉജ്വല യോജനയുടെ ഗുണമെന്നും മന്ത്രാലയം പറയുന്നു.
പദ്ധതിക്കു കീഴിൽ അനുവദിച്ച കണക്ഷനുകളിൽ പ്രത്യേക നിക്ഷേപം സ്വീകരിച്ചിട്ടില്ല. ഉപയോക്താക്കൾക്ക് 1600 രൂപയുടെ സഹായം നൽകുന്നതിനു പുറമേ ആദ്യ സിലിണ്ടറും ഗ്യാസ് സ്റ്റൗവും കണക്ഷൻ നൽകുന്ന കമ്പനി സൗജന്യമായി നൽകും. തുടക്കത്തിൽ ബിപിഎൽ വിഭാഗത്തിൽപ്പെട്ട അഞ്ചു കോടി കുടുംബനാഥകളെയാണ് ലക്ഷ്യമിട്ടതെങ്കിലും പിന്നീടത് എട്ടുകോടിയിലേക്ക് ഉയർത്തി. പദ്ധതിയുടെ ഗുണഭോക്താക്കളിൽ 35.1 ശതമാനം പട്ടിക വിഭാഗങ്ങളാണ്. ഉത്തർപ്രദേശ്, പശ്ചിമ ബംഗാൾ, ബിഹാർ, മധ്യപ്രദേശ്, രാജസ്ഥാൻ സംസ്ഥാനങ്ങളിലെ വനിതകളാണ് പദ്ധതിയുടെ ഗുണഭോക്താക്കളിൽ ഏറെയുമെന്നും റിപ്പോർട്ടിൽ പറയുന്നു.
