ഇംഫാൽ: മണിപ്പൂരിലെ പടിഞ്ഞാറൻ ഗ്രാമങ്ങളിൽ കനത്ത വെടിവയ്പ്പ്. ഞായറാഴ്ച രാവിലെയോടെയാണ് കോട്രുക് ഗ്രാമത്തിൽ ഇരുസമുദായത്തിലെയും വളന്‍റിയർമാർ തമ്മിൽ വെടിവയ്പ്പ് ആരംഭിച്ചത്. പ്രദേശത്തു നിന്ന് സ്ത്രീകളെയും കുട്ടികളെയും പ്രായമേറിയവരെയും മാറ്റിപ്പാർപ്പിച്ചിട്ടുണ്ട്. പ്രദേശത്ത് സുരക്ഷാ ഉദ്യോഗസ്ഥർ എത്തിയതായും നിലവിൽ അന്തരീക്ഷം ശാന്തമാണെന്നും പൊലീസ് വ്യക്തമാക്കി.
കഴിഞ്ഞ വർഷം മേയ് 3ന് ആരംഭിച്ച സാമുദായിക സംഘർഷത്തിനു ശേഷം കോട്രുക് ഗ്രാമത്തിൽ നിരന്തരമായി ഇരുസമുദായാംഗങ്ങളും വെടിവയ്പ്പ് നടത്താറുണ്ട്. ഒരു വർഷമായി നീണ്ടു നിൽക്കുന്ന സാമുദായിക സംഘർഷത്തിൽ മണിപ്പൂരിൽ ഇതു വരെ 200 പേരാണ് കൊല്ലപ്പെട്ടത്.
