തമിഴ്നാടിനെ തണുപ്പിച്ച് വടക്കു കിഴക്കൻ കാറ്റ്; ചെന്നൈയിൽ മാർച്ച് 3 വരെ മഴ

ചെന്നൈ: തമിഴ്നാട്ടിൽ ചെന്നൈ അടക്കമുള്ള വടക്കൻ നഗരങ്ങളിൽ മഴയ്ക്കു സാധ്യതയെന്ന് കാലാവസ്ഥാ വകുപ്പിന്‍റെ മുന്നറിയിപ്പ്. ചെന്നൈയിൽ മാർച്ച് 1 വരെ കനത്ത മഴയ്ക്കും കാറ്റിനും ഇടിമിന്നലിനും സാധ്യത പ്രവചിച്ചിട്ടുണ്ട്. തമിഴ്നാട്ടിലെ തെക്കൻ മേഖലകളിൽ കഴിഞ്ഞ ദിവസങ്ങളിൽ മഴ പെയ്തിരുന്നു. വടക്കു കിഴക്കൻ മേഖലകളിൽ നിന്നുള്ള തണുത്ത കാറ്റാണ് തമിഴ്നാട്ടിൽ മഴയ്ക്ക് കാരണമാകുന്നത്.

കാറ്റ് മൂലം അന്തരീക്ഷം സാധാരണയിൽ അധികമായി തണുക്കുമെന്നും മാർച്ച് 4 മുതൽ സാധാരണ അന്തരീക്ഷത്തിലേക്ക് മടങ്ങുമെന്നും കാലാവസ്ഥ വിഭാഗം പറയുന്നു.

തൂത്തുക്കുടി, പുതുക്കോട്ടൈ, രാമനാഥപുരം, മധുരൈ തുടങ്ങി 10 ജില്ലകളിൽ ഫെബ്രുവരി 28 മുതലാണ് ഒറ്റപ്പെട്ട മഴയ്ക്ക് സാധ്യത പ്രവചിച്ചിരിക്കുന്നത്. മാർച്ച് 1 മുതൽ തിരുനെൽവേലി, തെങ്കാശി, കന്യാകുമാരി, വിരുധനഗർ എന്നിവിടങ്ങളിൽ മഴ പെയ്തേക്കും.