ചെന്നൈയിൽ ജനശതാബ്‌ദി എക്‌സ്പ്രസ് പാളം തെറ്റി

ചെന്നൈ: ചെന്നൈ സെന്‍ട്രൽ സ്റ്റേഷനു സമീപം ജനശതാബ്ദി എക്‌സ്പ്രസ് ട്രെയിനിന്‍റെ ചക്രങ്ങൾ പാളം തെറ്റി.

ചെന്നൈയിലെ ബേസിൻ ബ്രിഡ്ജ് ജംഗ്ഷനു സമീപം ട്രെയിനിന്‍റെ 2 ചക്രങ്ങളാണ് പാളം തെറ്റിയത്. അപകടത്തിൽ ആളപായം റിപ്പോർട്ട് ചെയ്തിട്ടില്ലെന്ന് പൊലീസ് അറിയിച്ചു. സംഭവത്തെക്കുറിച്ച് ലോക്കോ പൈലറ്റും റെയിൽവേ പൊലീസും ചേർന്ന് അന്വേഷണം നടത്തിവരികയാണ്.

വെള്ളിയാഴ്ച പുലർച്ചെ ചെന്നൈ സെൻട്രൽ റെയിൽവേ സ്റ്റേഷനിൽ യാത്രക്കാരെ ഇറക്കിയ ശേഷം ബേസിൻ ബ്രിഡ്ജ് യാർഡിലേക്ക് നീങ്ങുന്നതിനിടെ ഒരു കോച്ചിന്‍റെ മുൻ ചക്രങ്ങൾ പാളം തെറ്റുകയായിരുന്നു.

2 മണിക്കൂർ നീണ്ട പരിശ്രമത്തിനൊടുവിൽ റെയിൽവേ ജീവനക്കാരുടെ സഹായത്തോടെ ഇരുചക്രങ്ങളും സാധാരണ നിലയിലാക്കി. സംഭവത്തെത്തുടർന്ന് മെയിൻ ലൈൻ ട്രെയിൻ സർവീസുകളെ ബാധിച്ചിട്ടില്ലെന്ന് റെയിൽവേ അധികൃതർ അറിയിച്ചു.