വിജയ്
ചെന്നൈ: തമിഴ്നാട് മുഖ്യമന്ത്രിയായ വിജയ്യുടെ നിയമസഭാ തെരഞ്ഞെടുപ്പ് വിജയം റദ്ദാക്കണമെന്ന് ആവശ്യപ്പെട്ട് കോടതിയിൽ ഹർജി. രാഷ്ട്രീയ നേട്ടത്തിന് വേണ്ടി വിജയ് കുട്ടികളെ തെരഞ്ഞെടുപ്പ് പ്രചാരണത്തിന് ഉപയോഗിച്ചെന്ന് ചൂണ്ടിക്കാട്ടി തിരുച്ചിറപ്പള്ളി ഈസ്റ്റ് മണ്ഡലത്തിലെ ഡിഎംകെ സ്ഥാനാർഥി ഇനിഗോ ഇരുദയരാജാണ് മദ്രാസ് ഹൈക്കോടതിയിൽ ഹർജി നൽകിയത്.
തിരുച്ചിറപ്പള്ളിയിൽ വിജയ്ക്കെതിരേ മത്സരിച്ച ഇനിഗോ 27, 416 വോട്ടുകൾക്ക് ദയനീയമായി തോറ്റിരുന്നു. തെരഞ്ഞെടുപ്പ് സത്യവാങ്മൂലത്തിൽ ആദായനികുതി അടച്ചതിന്റെ പൂർണ വിവരം മറച്ചുവച്ചതായും തെരഞ്ഞെടുപ്പ് പ്രചാരണത്തിനായി ചെലവാക്കിയ തുകയുടെ കണക്കുകൾ പുറത്തുവിട്ടില്ലെന്നും ആരാധനാലയങ്ങൾ കേന്ദ്രീകരിച്ച് വോട്ട് ചോദിച്ചതിലൂടെ വിജയ് തെരഞ്ഞെടുപ്പ് പെരുമാറ്റ ചട്ടം ലംഘിച്ചതായും ഹർജിയിൽ ആരോപിക്കുന്നു.
