ടെൽ അവിവ് ഫ്ലൈറ്റ് സർവീസ് സസ്പെൻഷൻ മേയ് 8 വരെ നീട്ടി എയർ ഇന്ത്യ

ന്യൂഡൽഹി: ടെൽ അവിവ് ഫ്ലൈറ്റ് സർവീസിന്‍റെ സസ്പെൻഷൻ മേയ് 8 വരെ നീട്ടി എയർ ഇന്ത്യ. എയർപോർട്ടിനു സമീപം മിസൈൽ ആക്രമണം ഉണ്ടായതിനു പിന്നാലെ മേയ് 6 വരെ ഡൽഹി- ടെൽ അവിവ്, ടെൽ അവിവ്- ഡൽഹി സർവീസുകൾ സസ്പെൻഡ് ചെയ്തതായി എയർ ഇന്ത്യ അറിയിച്ചിരുന്നു. പിന്നീട് സസ്പെൻഷൻ കാലാവധി നീട്ടുകയായിരുന്നു.

സാധാരണയായി ആഴ്ചയിൽ ടെൽ അവിവിലേക്ക് 5 ഫ്ലൈറ്റ് സർവീസുകളാണ് എയർ ഇന്ത്യക്ക് ഉള്ളത്. എക്സ് പ്ലാറ്റ്ഫോമിലൂടെയാണ് സസ്പെൻഷൻ നീട്ടിയതായി എയർ ഇന്ത്യ അറിയിച്ചത്.

സസ്പെൻഷൻ നീട്ടുന്നത് ബാധിക്കുന്ന ഉപയോക്താക്കൾക്ക് ബദൽ മാർഗങ്ങൾ ലഭ്യമാക്കുമെന്നും എയർ ഇന്ത്യ വ്യക്തമാക്കിയിട്ടുണ്ട്.