ദുബായ് ഉൾപ്പടെയുള്ള മിഡിൽ ഈസ്റ്റ് നഗരങ്ങളിലേക്ക് ഉടൻ വിമാന സർവീസ് ഇല്ല; നീട്ടി ബ്രിട്ടീഷ് എയർവേയ്സ്

ദുബായ്: പശ്ചിമേഷ്യയിൽ നിലനിൽക്കുന്ന അനിശ്ചിതാവസ്ഥയും യുദ്ധസാഹചര്യങ്ങളും കണക്കിലെടുത്ത് ദുബായ്, ദോഹ, ടെൽ അവീവ് ഉൾപ്പെടെയുള്ള പ്രമുഖ മിഡിൽ ഈസ്റ്റ് നഗരങ്ങളിലേക്കുള്ള വിമാന സർവീസുകൾ പുനരാരംഭിക്കുന്നത് ബ്രിട്ടീഷ് എയർവേയ്സ് വീണ്ടും നീട്ടി വെച്ചു.

ജൂലൈ ഒന്നു മുതൽ സർവീസുകൾ ഭാഗികമായി പുനരാരംഭിക്കാനായിരുന്നു നേരത്തെ തീരുമാനിച്ചിരുന്നതെങ്കിലും പുതിയ സാഹചര്യത്തിൽ ഓഗസ്റ്റ് 1 വരെ സർവീസ് ഉണ്ടാകില്ലെന്ന് എയർലൈൻ വക്താവ് അറിയിച്ചു. സർവീസുകൾ വീണ്ടും തുടങ്ങുമ്പോൾ സർവീസുകളുടെ എണ്ണത്തിൽ വലിയ കുറവുണ്ടാകും. ദുബായ്, ദോഹ, റിയാദ്, ടെൽ അവീവ് റൂട്ടുകളിൽ ദിവസേന ഒരു സർവീസ് മാത്രമായിരിക്കും നിലവിലുണ്ടാവുക.

സൗദി അറേബ്യയിലെ ജിദ്ദയിലേക്കുള്ള സർവീസുകൾ ബ്രിട്ടീഷ് എയർവേയ്സ് സ്ഥിരമായി നിർത്തലാക്കി. യാത്രക്കാരുമായി കമ്പനി നേരിട്ട് ബന്ധപ്പെടുന്നുണ്ടെന്നും, ടിക്കറ്റ് തുക പൂർണ്ണമായി തിരികെ നൽകാനോ മറ്റൊരു തീയതിയിലേക്ക് മാറ്റാനോ ഉള്ള സൗകര്യങ്ങൾ ഒരുക്കിയിട്ടുണ്ടെന്നും എയർലൈൻ അറിയിച്ചു.