ഈദുല്‍ ഫിത്വര്‍: ദുബായിൽ മലയാളികള്‍ക്കായി അൽ മനാർ ഇസ്ലാമിക് സെന്‍ററിന്‍റെ രണ്ട് ഈദ്ഗാഹുകള്‍
ദുബായ്: തുടര്‍ച്ചയായ രണ്ടാം വര്‍ഷവും ദുബായിലെ മലയാളികൾക്ക് വേണ്ടി യുഎഇ ഇന്ത്യന്‍ ഇസ്ലാഹി സെന്‍ററിന്‍റെയും അല്‍മനാര്‍ ഇസ്ലാമിക് സെന്‍ററിന്‍റെയും നേതൃത്വത്തിൽ രണ്ട് ഈദ് ഗാഹുകൾ ഒരുങ്ങുന്നു. അല്‍ഖൂസ് അല്‍മനാര്‍ ഇസ്ലാമിക് സെന്‍ററിലെ ഈദ് ഗാഹിന് മൗലവി അബ്ദുസ്സലാം മോങ്ങവും ഖിസൈസ് ലുലു ഹൈപ്പര്‍മാര്‍ക്കറ്റിനു സമീപമുള്ള ടാര്‍ജറ്റ് ഫുട്‌ബോള്‍ ഗ്രൗണ്ടില്‍ നടക്കുന്ന ഈദ്ഗാഹിന് മൗലവി ഹുസൈന്‍ കക്കാടും നേതൃത്വം നല്‍കുമെന്ന് അധികൃതർ വാർത്താസമ്മേളനത്തിൽ അറിയിച്ചു.
പെരുന്നാള്‍ ദിനത്തില്‍ രാവിലെ 6:20ന് ഈദ്‌നമസ്‌കാരവും തുടര്‍ന്ന് മലയാളത്തില്‍ ഈദ് പ്രഭാഷണവും നടക്കും. ഇതോടൊപ്പം തമിഴ്, ഉറുദു, ഇംഗ്ലീഷ് ഭാഷകളിലായി ഓരോ ഈദ് ഗാഹുകൾ വീതം നടത്താൻ അനുമതി ലഭിച്ചതായി ഇന്ത്യന്‍ ഇസ്ലാഹി സെന്‍റര്‍ ഭാരവാഹികള്‍ വാർത്താസമ്മേളനത്തില്‍ അറിയിച്ചു.
ബര്‍ഷാ എന്‍ ജി എസ് സ്‌കൂള്‍ ഗ്രൗണ്ടില്‍ ഇംഗ്ലീഷ് ഭാഷയില്‍ നടക്കുന്ന ഈദ് ഗാഹിന് ഷെയ്ഖ് അയാസ് ഹൗസിയും, മുഹൈസിന സോനാപൂരില്‍ നടക്കുന്ന ഉറുദു ഭാഷയിലെ ഈദ്ഗാഹിന് ഹാഫിസ് നഈമുള്ളാഹ് സനാബുലിയും ഖിസൈസ് ക്രെസന്‍റ് സ്‌കൂളില്‍ നടക്കുന്ന തമിഴ് ഭാഷയിലെ ഈദ്ഗാഹിന് ഷെയ്ഖ് സാദിഖുന്‍ മദനിയും നേതൃത്വം നല്‍കും.
യുഎഇയുടെ പൊതുമണ്ഡലത്തില്‍ നാലര പതിറ്റാണ്ടായി പ്രവര്‍ത്തിക്കുന്ന യു.എ.ഇ. ഇന്ത്യന്‍ ഇസ്ലാഹി സെന്‍ററിന് നല്‍കിയ ഈ അംഗീകാരത്തിന് ദുബായ് ഭരണാധികാരി ഷെയ്ഖ് മുഹമ്മദ് ബിന്‍ റാശിദ് അല്‍മക്തൂമിനും ദുബായ് മതകാര്യ വകുപ്പ് മേധാവി അഹമദ് ദര്‍വീശ് അല്‍മുഹൈരി, ഡയറക്റ്റര്‍ ഡോ. ഉമര്‍ മുഹമ്മദ് അല്‍കാത്തിബ് തുടങ്ങിയവര്‍ക്കും നന്ദി അറിയിക്കുന്നതായി ഭാരവാഹികള്‍ അറിയിച്ചു.
ഇത്തവണ ആദ്യമായി അജ്മാനില്‍ മലയാളികള്‍ക്കായി ഒരു ഈദ് ഗാഹിന് അനുമതി ലഭിച്ചുവെന്നും ഭാരവാഹികള്‍ പറഞ്ഞു. അജ്മാന്‍ അല്‍ജര്‍ഫ് ഹാബിറ്റാറ്റ് സ്‌കൂള്‍ ഗ്രൗണ്ടിലാണ് മലയാളത്തില്‍ ഈദ് ഗാഹ് സംഘടിപ്പിക്കുന്നത്.
1979ല്‍ ദുബായ് ആസ്ഥാനമായി തുടക്കം കുറിച്ച ഇന്ത്യന്‍ ഇസ്ലാഹി സെന്‍ററിന് വിവിധ എമിറേറ്റുകളിലുമായി 10 ശാഖ കമ്മിറ്റികള്‍ നിലവിലുണ്ട്. ദുബായ് ദാര്‍ അല്‍ബിര്‍റ് സൊസൈറ്റിയുമായി സഹകരിച്ച് 1500 ലേറെ പേര്‍ക്ക് പ്രതിദിനം ഇഫ്‌താർ കിറ്റുകൾ നൽകുന്നുണ്ട്.
ഷംസുദ്ദീന്‍ ബിന്‍ മുഹ്‌യുദ്ദീന്‍ (ചെയര്‍മാന്‍, അല്‍മനാര്‍ ഇസ്ലാമിക് സെന്‍റര്‍, റീജെന്‍സി ഗ്രൂപ്പ്) വി.കെ. സകരിയ്യ (മാനേജിങ് ഡയറക്റ്റര്‍, അല്‍മനാര്‍ ഇസ്ലാമിക് സെന്‍റര്‍ ) അബ്ദുസ്സലാം മോങ്ങം (ഡയറക്റ്റര്‍, അല്‍മനാര്‍ ഇസ്ലാമിക് സെന്‍റര്‍) റാഷിദ് ബിന്‍ അസ്‌ലം (ഡയറക്റ്റര്‍, അല്‍മനാര്‍ ഇസ്ലാമിക് സെന്‍റര്‍) ഹുസൈന്‍ കക്കാട് (പ്രസിഡണ്ട്, ഖിസൈസ് ഇന്ത്യന്‍ ഇസ്ലാഹി സെന്‍റര്‍) അബ്ദുന്നസീര്‍ പി.എ. (മീഡിയ കണ്‍വീനര്‍, യു.എ.ഇ. ഇന്ത്യന്‍ ഇസ്ലാഹി സെന്‍റര്‍) അക്ബര്‍ ഷാ (വര്‍ക്കിംഗ് ചെയര്‍മാന്‍, ഈദ് ഗാഹ് കമ്മിറ്റി) എന്നിവർ വാർത്താസമ്മേളനത്തിൽ പങ്കെടുത്തു.
