ന്യൂഡൽഹി: പ്രവാസമേഖലയിലെ വിദ്യാർഥികളെ ഒരുമിപ്പിക്കുന്നതിനും അടിയന്തരഘട്ടത്തിൽ സഹായമെത്തിക്കുന്നതിനും വേണ്ടി രൂപീകരിച്ച പ്രവാസി ലീഗൽ സെല്ലിന്‍റെ വിദ്യാർഥി വിഭാഗം പ്രവർത്തനമാരംഭിച്ചു. നോർക്ക റൂട്സ്‌ സിഇഒയും കേരള സർക്കാരിന്‍റെ അഡിഷണൽ സെക്രട്ടറിയുമായ അജിത് കൊളശ്ശേരി ഉദ്ഘാടനം ചെയ്തു.
സിഡിഎസ് മുൻ അധ്യാപകനും ഗ്രന്ഥകാരനും ഇന്‍റർനാഷണൽ ഇൻസ്റ്റിറ്റ്യൂട്ട് ഒഫ് മൈഗ്രേഷൻ ആൻഡ് ഡവലപ്മെന്‍റ് എന്ന സ്ഥാപനത്തിന്‍റെ അധ്യക്ഷനുമായ പ്രൊഫ. എസ്. ഇരുദയരാജൻ മുഖ്യപ്രഭാഷണം നടത്തി. പ്രവാസി ലീഗൽ സെൽ ഗ്ലോബൽ പ്രസിഡന്‍റ് അഡ്വ. ജോസ് എബ്രഹാം അധ്യക്ഷത വഹിച്ചു.
ലീഗൽ സെൽ വിദ്യാർഥി വിഭാഗം ഗ്ലോബൽ കോർഡിനേറ്റർ സുജ സുകേശൻ, ഗ്ലോബൽ വക്താവും ബഹറിൻ ചാപ്റ്റർ പ്രസിഡന്‍റുമായ സുധീർ തിരുനിലം, ദുബായ് ചാപ്റ്റർ അധ്യക്ഷൻ ടി.എൻ. കൃഷ്ണകുമാർ, യുകെ ചാപ്റ്റർ അധ്യക്ഷ അഡ്വ. സോണിയ സണ്ണി, കേരള ചാപ്റ്റർ ജനറൽ സെക്രട്ടറി അഡ്വ. ആർ. മുരളീധരൻ തുടങ്ങിയവർ പ്രസംഗിച്ചു.
അടുത്ത കാലത്തായി പല വിദേശ രാജ്യങ്ങളിലും ഇന്ത്യൻ വിദ്യാർഥികൾ കടുത്ത ചൂഷണങ്ങൾക്ക് വിധേയരാകുന്ന സാഹചര്യത്തിലാണ് പ്രവാസി ലീഗൽ സെൽ വിദ്യാർഥി വിഭാഗം രൂപീകരിച്ചത്. വിദേശത്തുള്ള ഇന്ത്യൻ വിദ്യാർഥികളെ സഹായിക്കുക, വിദേശത്തേക്ക് കുടിയേറുന്നവർക്കായി ബോധവത്കരണ പരിപാടികൾ സംഘടിപ്പിക്കുക തുടങ്ങിയവയാണ് ഇതിന്‍റെ ലക്ഷ്യം.
