യുഎഇ സ്വകാര്യ മേഖലാ ജീവനക്കാർക്കുള്ള ബലിപെരുന്നാൾ അവധി പ്രഖ്യാപിച്ചു

ദുബായ്: യുഎഇയിലെ സ്വകാര്യ മേഖലയിലെ ജീവനക്കാർക്കുള്ള ബലിപെരുന്നാൾ, അറഫാ ദിന അവധികൾ ഔദ്യോഗികമായി പ്രഖ്യാപിച്ചു. മാനവ ശേഷി സ്വദേശിവത്കരണ മന്ത്രാലയമാണ് ഇക്കാര്യം അറിയിച്ചത്.

സ്വകാര്യ മേഖലയിലെ ജീവനക്കാർക്ക് ശമ്പളത്തോടുകൂടിയ അവധിയാണ് ലഭിക്കുക. മേയ് 26 ചൊവ്വാഴ്ച (അറഫാ ദിനം) മുതൽ മെയ് 29 വെള്ളിയാഴ്ച വരെയാണ് അവധി. നാല് ദിവസത്തെ ഔദ്യോഗിക അവധിക്ക് ശേഷം ശനി, ഞായർ ദിവസങ്ങളിലെ വാരാന്ത്യ അവധി കൂടി ചേരുമ്പോൾ സ്വകാര്യ മേഖലയിലുള്ള ഭൂരിഭാഗം ജീവനക്കാർക്കും തുടർച്ചയായി ആറ് ദിവസം അവധി കിട്ടും.

അവധിക്ക് ശേഷം ജൂൺ 1 തിങ്കളാഴ്ച ഓഫിസുകൾ വീണ്ടും സാധാരണ നിലയിൽ പ്രവർത്തിച്ചു തുടങ്ങും. യുഎഇയിൽ മാസപ്പിറവി ദൃശ്യമായതിനെ തുടർന്ന് മേയ് 27 ബുധനാഴ്ചയാണ് ബലിപെരുന്നാൾ ആയി നിശ്ചയിച്ചിരിക്കുന്നത്.