ബ്രസീലിനു ദുഃസ്വപ്നമായി ഹാലൻഡ്; നോർവേ ക്വാർട്ടറിൽ

ബ്രസീൽ ആരാധകർ കണ്ട ദുഃസ്വപ്നം ഫലിച്ചു. എർലിങ് ഹാലൻഡ് മുടിയഴിച്ചാടി. ലോകകപ്പിൽ സാംബാ താളം നിലച്ചു. നോർവീജിയൻ പെരുമ്പറയിൽ വൈക്കിങ് റോയുടെ മരണതാളം മുഴങ്ങി. ഫിഫ ലോകകപ്പിന്‍റെ പ്രീക്വാർട്ടർ പോരാട്ടത്തിൽ ഒന്നിനെതിരേ രണ്ട് ഗോളുകൾക്ക് കാനറികളെ കെട്ടുകെട്ടിച്ച് നോർവേ ചരിത്രത്തിലാദ്യമായി ക്വാർട്ടർ ഫൈനലിലേക്ക് മാർച്ച് ചെയ്തിരിക്കുന്നു. 1990-നു ശേഷം ബ്രസീലിന്‍റെ ഏറ്റവും ദയനീയമായ ലോകകപ്പ് പുറത്താകലിനാണ് ന്യൂയോർക്ക് ന്യൂജേഴ്‌സി സ്റ്റേഡിയം സാക്ഷ്യം വഹിച്ചത്.

തുടക്കം മുതൽ ഇരുപക്ഷവും ഇഞ്ചോടിഞ്ച് പോരാടിയെന്നു പറയാമെങ്കിലും നോർവേയ്ക്കായിരുന്നു പന്ത് നിയന്ത്രിക്കുന്നതിലും പാസിങ്ങിലും ആധിപത്യം. പക്ഷേ, നോർവേയുടെ ടാക്റ്റിക്കൽ പൊസഷൻ ഫുട്ബോളിനെ അതിവേഗ മുന്നേറ്റങ്ങളിലൂടെ അതിജീവിക്കാൻ സാധിക്കുമെന്ന് ബ്രസീൽ ഇടയ്ക്കിടെ ഓർമിപ്പിച്ചുകൊണ്ടിരുന്നു. മത്സരത്തിൽ ആദ്യ സുവർണാവസരം കിട്ടിയതും ബ്രസീലിന്.

പതിനഞ്ചാം മിനിറ്റിൽ മത്തേവൂസ് കൂന്യയെ ബോക്സിനുള്ളിൽ ക്രിസ്റ്റഫർ അജെർ വീഴ്ത്തിയതിന് വാർ (VAR) പരിശോധനയിലൂടെ അവർക്ക് പെനൽറ്റിയും കിട്ടി. എന്നാൽ, ബ്രസീൽ ആരാധകരെ നിശബ്ദരാക്കി ബ്രൂണോ ഗ്വിമാരസിന്‍റെ കിക്ക് നോർവീജിയൻ ഗോൾകീപ്പർ ഓറിയൻ നെയ്‌ലാൻഡ് ഇടതുവശത്തേക്ക് ഡൈവ് ചെയ്ത് തടുത്തിട്ടു.

തുടർന്ന് ഗബ്രിയേൽ മാർട്ടിനെല്ലിയുടെയും വിനീഷ്യസ് ജൂനിയറിന്‍റെയും ഗോളെന്നുറച്ച മുന്നേറ്റങ്ങൾ കാലുകൾ കൊണ്ട് പ്രതിരോധിച്ച് മുപ്പത്തിയഞ്ചുകാരനായ നെയ്‌ലാൻഡ് നോർവേയുടെ രക്ഷകനായി. രണ്ടാം പകുതിയിൽ പകരക്കാരനായി ഇറങ്ങിയ കൗമാര താരം എൻഡ്രിക്കിന് വിനീഷ്യസ് നൽകിയ അളന്നുമുറിച്ച പാസ് ഗോളാക്കാൻ കഴിഞ്ഞില്ല.

നോർവേയും നിരന്തരം ബ്രസീൽ ബോക്സിനെ വിറപ്പിച്ചുകൊണ്ടിരുന്നു. പക്ഷേ, ഒരു വണ്ടർ ടച്ച് ഒഴികെ ആദ്യ പകുതിയിൽ ഉടനീളം ബ്രസീലിയൻ ബോക്സിൽ ഒരു കാഴ്ചക്കാരൻ മാത്രമായിരുന്നു എർലിങ് ഹാലൻഡ്. ഒടുവിൽ, 79-ാം മിനിറ്റിൽ ആ നിമിഷം വന്നു. ആൻഡ്രിയാസ് ഷെൽഡ്രപ്പ് ഇടതുഭാഗത്തുനിന്ന് നൽകിയ കൃത്യതയാർന്ന ക്രോസ്, ഉയർന്നുചാടിയ എർലിങ് ഹാലൻഡ് ഒരു ബുള്ളറ്റ് ഹെഡ്ഡറിലൂടെ അലിസൺ ബെക്കറെ കാഴ്ചക്കാരനാക്കി ബ്രസീൽ വലയിലെത്തിച്ചു (1-0).

തുടർന്ന് കളി തീരാൻ മിനിറ്റുകൾ മാത്രം ബാക്കിനിൽക്കെ, ഡാനിലോയുടെ കാലുകൾക്കിടയിലൂടെ ഹാലൻഡ് തൊടുത്ത മനോഹരമായ ഷോട്ട് ഒരിക്കൽക്കൂടി അലിസണെ കീഴ്പ്പെടുത്തിയതോടെ (90-ാം മിനിറ്റ്) ബ്രസീലിന്‍റെ പതനം പൂർത്തിയായി (2-0).

മത്സരത്തിലെ രണ്ടാം ഗോളോടെ ഹാലൻഡ് ഗോൾഡൻ ബൂട്ട് റേസിൽ എംബാപ്പെക്കും മെസ്സിക്കും ഒപ്പമെത്തി. മൂവർക്കും ഏഴ് ഗോൾ വീതമാണെങ്കിലും, രണ്ട് അസിസ്റ്റുകൾ കൂടിയുള്ള എംബാപ്പെ മുന്നിട്ടു നിൽക്കുന്നു. മെസിയും എംബാപ്പെയും അഞ്ച് മത്സരങ്ങൾക്കിറങ്ങിയപ്പോൾ, ഹാലൻഡ് നാല് മത്സരങ്ങളേ തന്‍റെ കന്നി ലോകകപ്പിൽ കളിച്ചിട്ടുള്ളൂ. നോർവേയ്ക്കായി കളിച്ച 54 മത്സരങ്ങളിൽ നിന്ന് 62 ഗോളുകൾ എന്ന അവിശ്വസനീയ റെക്കോർഡും 'വോൾഡ വൈക്കിങ്' സ്വന്തമാക്കി. എർലിങ് ഹാലൻഡ് തന്നെയാണ് മത്സരത്തിലെ മികച്ച കളിക്കാരൻ.

ഇഞ്ചുറി ടൈമിന്‍റെ പത്താം മിനിറ്റിൽ നെയ്മർ പെനാൽറ്റിയിലൂടെ ഒരു ഗോൾ മടക്കിയെങ്കിലും (2-1) അപ്പോഴേക്കും ബ്രസീലിന്‍റെ വിധി കുറിക്കപ്പെട്ടിരുന്നു. സാംബാ നർത്തകർ കണ്ണീരോടെ മടങ്ങുമ്പോൾ, ജൂലൈ 11-ന് മയാമിയിൽ നടക്കുന്ന ക്വാർട്ടർ ഫൈനലിൽ മെക്സിക്കോയോ ഇംഗ്ലണ്ടോ ആയിരിക്കും നോർവേയുടെ എതിരാളികൾ.