ജർമൻ പ്ലേമേക്കർ കയ് ഹാവെർട്സിന്റെ ഗോൾ ആഘോഷം.
ഹൂസ്റ്റൺ: ലോകകപ്പ് ഫുട്ബോളിൽ കരുത്തരായ ജർമനിക്ക് തകർപ്പൻ തുടക്കം. ലോകകപ്പ് അരങ്ങേറ്റം കുറിച്ച കുഞ്ഞൻ രാജ്യമായ കുറാസാവോയെ ഒന്നിനെതിരേ ഏഴ് ഗോളുകൾക്ക് തകർത്താണ് മുൻ ചാംപ്യന്മാർ വരവറിയിച്ചത്. കയ് ഹാവെർട്സിന്റെ ഇരട്ട ഗോളുകളും ജർമൻ മുന്നേറ്റനിരയുടെ മിന്നും പ്രകടനവും ഹൂസ്റ്റൺ സ്റ്റേഡിയത്തിലെ പതിനായിരക്കണക്കിന് കാണികൾക്ക് അവിസ്മരണീയ നിമിഷങ്ങൾ സമ്മാനിച്ചു.
മത്സരത്തിന്റെ ആറാം മിനിറ്റിൽ തന്നെ ഫെലിക്സ് എൻമെച്ചയിലൂടെ ജർമനി മുന്നിലെത്തി. എന്നാൽ, 21-ാം മിനിറ്റിൽ ലിവാനോ കോമെൻഷ്യയിലൂടെ കുറാസാവോ തിരിച്ചടിച്ചു. ലോകകപ്പ് ചരിത്രത്തിൽ ആദ്യമായി ഒരു ഗോൾ നേടാൻ കഴിഞ്ഞതിന്റെ ആവേശത്തിലായിരുന്നു കരീബിയൻ രാജ്യമായ കുറാസാവോയുടെ ആരാധകർ. എന്നാൽ, സമനില ഗോളിന് ശേഷം ജർമനി കളി പൂർണമായും കൈപ്പിടിയിലൊതുക്കി.
38-ാം മിനിറ്റിൽ നിക്കോ ഷ്ലോട്ടർബെക്കിന്റെ ഹെഡറിലൂടെ ജർമനി ലീഡ് തിരിച്ചുപിടിച്ചു. ആദ്യ പകുതിയുടെ അവസാന മിനിറ്റുകളിൽ ലഭിച്ച പെനാൽറ്റി ഗോളാക്കി മാറ്റിയ കയ് ഹാവെർട്സ് സ്കോർ 3-1 ആക്കി ഉയർത്തി. രണ്ടാം പകുതിയിൽ ജർമൻ പട കൂടുതൽ കരുത്തോടെയാണ് മൈതാനത്തിറങ്ങിയത്. ജമാൽ മുസിയാല (47'), നഥാനിയേൽ ബ്രൗൺ (68'), ഡെനിസ് ഉന്ദാവ് (78') എന്നിവർ സ്കോർ ചെയ്തപ്പോൾ, 88-ാം മിനിറ്റിൽ ഹാവെർട്സ് തന്റെ രണ്ടാം ഗോളും നേടി ജർമനിയുടെ ഗോൾവേട്ട പൂർത്തിയാക്കി.
റെക്കോർഡുകളുടെ മത്സരവേദി
ലോകകപ്പ് ചരിത്രത്തിലെ ഏറ്റവും പ്രായം കുറഞ്ഞ പരിശീലകനായ 38 വയസുകാരൻ ജൂലിയൻ നാഗൽസ്മാനും, ഏറ്റവും പ്രായമേറിയ പരിശീലകനായ 78 വയസുകാരൻ ഡിക്ക് അഡ്വോക്കാട്ടും നേർക്കുനേർ വന്ന മത്സരമെന്ന പ്രത്യേകതയും ഈ പോരാട്ടത്തിനുണ്ടായിരുന്നു. 40-ാം വയസിൽ അന്താരാഷ്ട്ര ഫുട്ബോളിലേക്ക് തിരിച്ചെത്തിയ ഇതിഹാസ ഗോൾകീപ്പർ മാനുവൽ നോയർ വീണ്ടും ജർമൻ പോസ്റ്റിൽ തിളങ്ങി.
ലോകകപ്പ് കളിക്കുന്ന ഏറ്റവും ചെറിയ രാജ്യമായി ചരിത്രം കുറിച്ച കുറാസാവോയ്ക്ക് വലിയൊരു പാഠമായി മാറിയ മത്സരമാണിത്. 2014-ലെ കിരീടധാരണത്തിന് ശേഷം റഷ്യയിലും ഖത്തറിലും ഗ്രൂപ്പ് ഘട്ടത്തിൽ പുറത്തായ ജർമനി, ഇത്തവണ ശക്തമായ തിരിച്ചുവരവാണ് ലക്ഷ്യമിടുന്നത്. വരുന്ന ശനിയാഴ്ച ടൊറന്റോയിൽ വെച്ച് ഐവറി കോസ്റ്റിനെയാണ് ജർമനി അടുത്ത മത്സരത്തിൽ നേരിടുക. അതേദിവസം തന്നെ കുറാസാവോ ഇക്വഡോറിനെ നേരിടും.
