കെ.എൽ. രാഹുൽ, ശുഭ്മൻ ഗിൽ
കൊളംബോ: ഓഗസ്റ്റ് 15ന് ശ്രീലങ്കയ്ക്കെതിരേ ആരംഭിക്കാനിരിക്കുന്ന ടെസ്റ്റ് പരമ്പരയ്ക്ക് മുന്നോടിയായി നടക്കുന്ന ത്രിദിന സന്നാഹ മത്സരത്തിലെ ആദ്യ ദിനം ഇന്ത്യൻ ക്യാപ്റ്റൻ ശുഭ്മൻ ഗില്ലിന് നഷ്ടമായി.
പരിശീലനത്തിനിടെ വലതു വിരലിന് പരുക്കേറ്റതാണ് താരത്തിന് തിരിച്ചടിയായത്. ഗില്ലിന്റെ അഭാവത്തിൽ കെ.എൽ. രാഹുലാണ് ഇന്ത്യൻ ടീമിനെ നയിക്കുന്നത്. ബിസിസിഐ ഗില്ലിന്റെ പരുക്ക് നിരീക്ഷിച്ചുവരുകയാണ്. താരത്തിന് പരുക്കേറ്റ കാര്യം ബിസിസിഐ തങ്ങളുടെ ഔദ്യോഗിക എക്സ് അക്കൗണ്ടിലൂടെ സ്ഥിരീകരിച്ചിട്ടുണ്ട്.
ഇന്ത്യക്കെതിരേ നിർണായക ടോസ് ലഭിച്ച ശ്രീലങ്ക ഇലവൻ ബാറ്റിങ് തെരഞ്ഞെടുത്തു. ഒടുവിൽ വിവരം ലഭിക്കുമ്പോൾ വിക്കറ്റ് നഷ്ടമില്ലാതെ 28 റൺസ് അടിച്ചെടുത്തിട്ടുണ്ട് ശ്രീലങ്ക. പേസർമാരായ പ്രസിദ്ധ് കൃഷ്ണയ്ക്കും മുഹമ്മദ് സിറാജിനും വിക്കറ്റുകളൊന്നും ലഭിച്ചില്ല.
