തൃശൂര്: കേരള ക്രിക്കറ്റ് അസോസിയേഷന് സംഘടിപ്പിക്കുന്ന പ്രഥമ കേരള ക്രിക്കറ്റ് ലീഗിന് ഒരുങ്ങി തൃശൂര് ടൈറ്റന്സ്. ഇതിന്റെ ഭാഗമായി ടീമിന്റെ ജഴ്സിയും ആന്തവും പുറത്തിറക്കി. തൃശൂര് അത്രേയ ക്രിക്കറ്റ് അക്കാഡമിയില് നടത്തിയ പ്രൗഢ ഗംഭീരമായ ചടങ്ങില് ടൈറ്റന്സിന്റെ പരിശീലകനും മുന് കേരള ക്രിക്കറ്റ് ടീം ക്യാപ്റ്റനുമായ സുനില് ഒയാസിസ്, ചലച്ചിത്രതാരം ദേവ് മോഹൻ, ടൈറ്റന്സ് ടീം ഉടമ സജ്ജാദ് സേട്ട്, ടീം ക്യാപ്റ്റൻ വരുൺ നായനാർ എന്നിവര് ചേര്ന്നാണ് ജഴ്സി പുറത്തിറക്കിയത്. ഇതേ ചടങ്ങിലാണ് തൃശൂര് ടൈറ്റന്സിന്റെ ക്യാപ്റ്റനായി വരുണ് നായനാരെ പ്രഖ്യാപിച്ചത്. കേരള ക്രിക്കറ്റ് ടീം അംഗവും ഐ.പി.എല് താരവുമായ വിഷ്ണു വിനോദാണ് ടീമിന്റെ ഐക്കണ് താരം.
സെപ്റ്റംബര് 2 മുതല് തിരുവനന്തപുരം കാര്യവട്ടം ഗ്രീന്ഫീല്ഡ് സ്റ്റേഡിയത്തിലാണ് കേരള ക്രിക്കറ്റ് ലീഗ് മത്സരങ്ങള് നടക്കുന്നത്. തൃശൂര് ടൈറ്റന്സ് കൂടാതെ, മറ്റു അഞ്ച് ടീമുകള് കൂടി മത്സരത്തില് പങ്കെടുക്കുന്നുണ്ട്.
'ഞങ്ങള് തൃശൂര് ടൈറ്റന്സ്' എന്ന ടീം ആന്തം ടൈറ്റന്സ് ടീം സിഇഒ ശ്രീജിത്ത് രാജന് പുറത്തിറക്കി. പ്രശസ്ത ചലച്ചിത്ര ഗാനരചയിതാവായ ബി.കെ. ഹരിനാരായണന് രചിച്ച ആന്തത്തിന് സംഗീതം നല്കിയിരിക്കുന്നത് നിരഞ്ജ് സുരേഷാണ്. സച്ചിന് വാര്യറും നിരഞ്ജ് സുരേഷും ചേര്ന്നാണ് ആന്തം ആലപിച്ചിരിക്കുന്നത്.
തൃശൂരിന്റെ സ്വന്തം പൂരത്തില് നിന്നും അതിന്റെ പീതവര്ണത്തില് നിന്നും സമൃദ്ധമായ പ്രകൃതിയുടെ പച്ചപ്പില് നിന്നും പ്രേരണ ഉള്ക്കൊണ്ടാണ് ടൈറ്റന്സിന്റെ ജെഴ്സി ഡിസൈന് ചെയ്തിരിക്കുന്നത്. ഉത്സവനഗരിയായ തൃശൂരിനും ദൈവത്തിന്റെ സ്വന്തം നാടായ നമ്മുടെ കേരളത്തിന്റെ പ്രകൃതിമനോഹാരിതയ്ക്കുമുള്ള സമര്പ്പണമാണ് ജഴ്സിയുടെ രൂപകല്പ്പനയെന്ന് ടീം ഉടമ സജ്ജാദ് സേട്ട്.
കൊച്ചി ആസ്ഥാനമായ ക്രിയേറ്റിവ് ഏജന്സി പോപ്കോണ് കഴിഞ്ഞ രണ്ടു സീസണ് ആയി ചെയ്തുവരുന്ന 'വാട്ട് ഈസ് യുവര് ഹൈ' എന്ന സിഎസ്ആര് ഉദ്യമത്തില് ഈ സീസണില് തൃശൂര് ടൈറ്റന്സ് പങ്കുചേരുന്നതായി ടീം മെന്റ്റര് സുനില് അറിയിച്ചു.
മനസ്സിന്റെയും ശരീരത്തിന്റെയും ആരോഗ്യം നിലനിര്ത്താന് ഏതെങ്കിലുമൊരു കായിക ഇനത്തില് ഏര്പ്പെടുക എന്ന സന്ദേശം ഉള്ക്കൊള്ളുന്ന 'സ്പോര്ട്സ് ഈസ് ഔര് ഹൈ' എന്ന തീമില് ചുവര് ചിത്ര രചനാ മത്സരമാണ് ഈ വര്ഷം ഇതിന്റെ ഭാഗമായി ആവിഷ്കരിച്ചിട്ടുള്ളത്. അതിന്റെ പ്രഖ്യാപനവും ചടങ്ങില് നടത്തി. കേരളത്തിലുടനീളമുള്ളവര്ക്ക് മത്സരത്തില് ഓണ്ലൈനായി പങ്കെടുക്കാമെന്ന് സുനില് അറിയിച്ചു. ചടങ്ങിൽ തൃശൂർ ജില്ലാ ക്രിക്കറ്റ് അസോസിയേഷൻ സെക്രട്ടറി ജോസ് പോൾ സംസാരിച്ചു.
തൃശൂർ ടൈറ്റൻ ടീം
വിഷ്ണു വിനോദ് (ഐക്കൺ പ്ലെയർ, വിക്കറ്റ് കീപ്പർ), വരുൺ നായനാർ (ക്യാപ്റ്റൻ) അഭിഷേക് പ്രതാപ് (ഓള്റൗണ്ടര്), മോനു കൃഷ്ണ (വിക്കറ്റ് കീപ്പര്), ആദിത്യ വിനോദ് (ബൗളര്), അനസ് നസീര് (ബാറ്റർ), മൊഹമ്മദ് ഇഷാഖ് (ബൗളര്), ഗോകുല് ഗോപിനാഥ് (ബൗളര്), അക്ഷയ് മനോഹര് (ഓള്റൗണ്ടര്), ഇമ്രാന് അഹമ്മദ് (ഓള്റൗണ്ടര്), ജിഷ്ണു എ (ഓള്റൗണ്ടര്), അര്ജുന് വേണുഗോപാല് (ഓള്റൗണ്ടര്), ഏഥന് ആപ്പിള് ടോം (ഓള്റൗണ്ടര്) വൈശാഖ് ചന്ദ്രന് (ഓള്റൗണ്ടര്), മിഥുന് പികെ (ഓള്റൗണ്ടര്), നിതീഷ് എംഡി (ബൗളര്), ആനന്ദ് സാഗര് (ബാറ്റർ), നിരഞ്ചന് ദേവ് (ബാറ്റർ) എന്നിവരാണ് ടൈറ്റന്സിലെ മറ്റ് ടീം അംഗങ്ങള്.
