സൂറിച്ച്: ലോങ് ജംപിൽ മത്സരിച്ച മലയാളി താരം എം. ശ്രീശങ്കറിന് അഞ്ചാം സ്ഥാനമാണ് ഡയമണ്ട് ലീഗിന്റെ സൂറിച്ച് ലെഗ്ഗിൽ ലഭിച്ചിരിക്കുന്നത്. ബുഡാപെസ്റ്റിൽ നടന്ന ലോക ചാംപ്യൻഷിപ്പിൽ ഫൈനലിനു യോഗ്യത നേടാൻ സാധിക്കാതെ പോയ ശ്രീശങ്കർ, ഇവിടെ ആദ്യ റൗണ്ട് കഴിയുമ്പോൾ ഒന്നാമതായിരുന്നു. എന്നാൽ, ആദ്യ ശ്രമത്തെക്കാൾ മികച്ച ദൂരം കണ്ടെത്താൻ അടുത്ത റൗണ്ടുകളിൽ സാധിക്കാതെ വന്നതോടെ ടോപ് ത്രീയിൽ നിന്നു പുറത്തായി. മൂന്നാം റൗണ്ടിന്റെ അവസാനം വരെ മൂന്നാം സ്ഥാനം നിലനിർത്താൻ സാധിച്ചിരുന്നു. അഞ്ചാം റൗണ്ടിലാണ് അഞ്ചാം സ്ഥാനത്തായത്.
ഒളിംപിക്സിലും ലോക ചാംപ്യൻഷിപ്പിലും സ്വർണം നേടിയ ഗ്രീസിന്റെ മിൽറ്റിയാഡിസ് ടെൻറോഗ്ലുവാണ് ഈയിനത്തിൽ ഒന്നാമതെത്തിയത്. ദൂരം, 8.20 മീറ്റർ. 8.41 മീറ്ററാണ് ശ്രീശങ്കറിന്റെ കരിയറിലെ ഏറ്റവും മികച്ച ദൂരം.
