പലതരത്തിൽ അതിശയമുണ്ടാക്കുന്നതും കൗതുകമുണർത്തുന്നതുമായ വാർത്തകളാണ് ദിവസവും പുറത്തുവരുന്നത്. ഇപ്പോഴിതാ ഒരു പാവയുടെ വിലകേട്ട് കേട്ടവരുടെയെല്ലാം കണ്ണുതള്ളി. വെറും പാവയല്ല, കാലുകൾ നഷ്ടപ്പെട്ടതുൾപ്പെടെ വിവിധ കേടുപാടുകളുള്ള ഒരു പാവ, വിറ്റു പോയത് ലക്ഷങ്ങൾക്കാണ്.
യുകെയിൽ നടന്ന വാശിയേറിയ ലേലത്തിൽ 53,000 പൗണ്ടിനാണ് 'കമ്മർ & റെയിൻഹാർഡ് 102 വാൾട്ടർ ബിസ്ക് സോക്കറ്റ് ഹെഡ് ആന്റിക് ഡോൾ' എന്നറിയപ്പെടുന്ന പാവ വിറ്റുപോയത്. അതായത് ഏകദേശം 52 ലക്ഷം ഇന്ത്യൻ രൂപ.
ഈ പാവ അപൂർവ കളിപ്പാട്ടങ്ങളുടെ പട്ടികയിൽ ഉൾപ്പെടുന്നതാണെന്നാണ് ലേല കമ്പനി അവകാശപ്പെടുന്നത്. വർഷങ്ങളോളം ഇതിന് പഴക്കമുണ്ടെന്നും പാരമ്പര്യമായി കൈമാറിവന്നതാണെന്നും പാവയുടെ ഉടമ വ്യക്തമാക്കി. ടീസൈഡ് ആസ്ഥാനമായുള്ള വെക്റ്റിസ് എന്ന സ്ഥാപനമാണ് ലേലം നടത്തിയത്. അമെരിക്കയിൽ നിന്നുള്ള ഒരു വ്യക്തിയാണ് പാവ സ്വന്തമാക്കിയതെന്നാണ് റിപ്പോർട്ടുകൾ.
