പാലക്കാട്: ഹാഷിഷ് ഓയിൽ കടത്തിയ കേസിലെ പ്രതിയെ പാലക്കാട് എക്സൈസിന്റെ സർക്കിൾ ഓഫിസിലെ ലോക്കപ്പിനുള്ളിൽ തൂങ്ങിമരിച്ച നിലയിൽ കണ്ടെത്തി. ഇടുക്കി സ്വദേശി ഷോജോ ജോൺ ആണ് മരിച്ചത്.
രണ്ട് കിലോ ഹാഷിഷ് ഓയിലുമായി ചൊവ്വാഴ്ചയാണ് എക്സൈസ് പ്രതിയെ കസ്റ്റഡിയിലെടുക്കുന്നത്. തുടർന്ന് ലോക്കപ്പ് സംവിധാനമുള്ള പാലക്കാട് എക്സൈസ് ഓഫീസിലേക്ക് മാറ്റുകയായിരുന്നു. രാവിലെ സെല്ലിന്റെ അഴിക്കിടയിൽ തൂങ്ങിമരിച്ച നിലയിൽ കണ്ടെത്തുകയായിരുന്നു.
അതേസമയം മരണത്തിൽ ദുരൂഹത ആരോപിച്ച് ഷോജോയുടെ ഭാര്യ രംഗത്തെത്തി. ഷോജോയെ വീട്ടിൽ നിന്ന് അറസ്റ്റ് ചെയ്തപ്പോൾ തന്നെ കുറ്റം സമ്മതിച്ചിരുന്നു. മർദിക്കുകയോ മറ്റോ ചെയ്തിട്ടുണ്ടോയെന്ന് അന്വേഷണം നടത്തണെമെന്നും ഭാര്യ ആവശ്യപ്പെട്ടു.