കണ്ണൂർ: എഡിഎം നവീൻ ബാബുവിന്റെ മരണത്തിൽ ആരോപണവിധേയയായ ജില്ലാപഞ്ചായത്ത് പ്രസിഡന്റ് പി.പി. ദിവ്യയുടെ വീടിന് സംരക്ഷണം ഒരുക്കി സിപിഎം പ്രവർത്തകർ. ബിജെപിയും കോൺഗ്രസും ദിവ്യയുടെ വീട്ടിലേക്ക് പ്രതിഷേധ മാർച്ച് പ്രഖ്യാപിച്ചതിന്റെ പശ്ചാതലത്തിലാണ് ദിവ്യയുടെ വീടിന് സിപിഎം പ്രവർത്തകർ സംരക്ഷണം ഒരുക്കിയത്.
ബുധനാഴ്ച രാവിലെ തന്നെ സിപിഎം പ്രവർത്തകർ ദിവ്യയുടെ വീടിന് മുന്നിലെത്തിയിരുന്നു. വനിതാ പ്രവർത്തകരാണ് കൂടുതലും. ലോക്കൽ കമ്മിറ്റി ഭാരവാഹികളും സ്ഥലത്തെത്തിയിട്ടുണ്ട്. അതേസമയം വിഷയത്തോട് പ്രതികരിക്കാൻ ദിവ്യ ഇതുവരെ തയ്യാറായിട്ടില്ല.
കണ്ണൂർ എഡിഎം നവീൻ ബാബു ആത്മഹത്യ ചെയ്തതുമായി ബന്ധപ്പെട്ട് ദിവ്യക്കെതിരെ വലിയ വിമർശനങ്ങൾ ഉയർന്നിരുന്നു. ഈ സാഹചര്യത്തിലാണ് ദിവ്യയുടെ വീടിന് സിപിഎമ്മിന്റെ സംരക്ഷണം.