കൊച്ചി: എറണാകുളം- മാട്ടുപ്പെട്ടി സർവീസ് ഉദ്ഘാടനത്തിന് പിന്നാലെ സീ പ്ലെയിൻ പദ്ധതിയിൽ ആശങ്ക അറിയിച്ച് വനം വകുപ്പ്. മാട്ടുപെട്ടി ഡാമിനെ പദ്ധതിയുടെ ഭാഗമാക്കുന്നതിലാണ് ആശങ്ക. ഈ ഡാം ആനത്താരയുടെ ഭാഗമാണ്. വിമാനം ഇറങ്ങുന്നത് ആനകളിൽ പ്രകോപനം സൃഷ്ടിക്കുമെന്നാണ് സംയുക്ത പരിശോധനയിൽ വനം വകുപ്പ് ആശങ്ക അറിയിച്ചത്. നിലവിലെ പരീക്ഷണ ലാന്ഡിങിന് എതിര്പ്പില്ലെന്നും അവർ അറിയിച്ചു.
അതേസമയം, റൂട്ട് അന്തിമമായിട്ടില്ലെന്നും ആവശ്യമായ ചര്ച്ച നടത്തി ആശങ്കകള് പരിഹരിക്കുമെന്നും ടൂറിസം മന്ത്രി മുഹമ്മദ് റിയാസ്. പരിസ്ഥിതി പ്രശ്നങ്ങള് ഇല്ലാത്ത സ്ഥലങ്ങളിലൂടെയായിരിക്കും സീ പ്ലെയിൻ പദ്ധതി നടപ്പാക്കുക. ഡാമിന് മുകളിൽ സീ പ്ലെയിൻ ഓടിക്കുന്നതിൽ പ്രശ്നമുണ്ടാകില്ല.
ഉമ്മൻചാണ്ടി സര്ക്കാര് സീ പ്ലെയിൻ കൊണ്ടുവന്നപ്പോള് ഇടത് ട്രേഡ് യൂണിയനുകള് സമരം ചെയ്തതിലും റിയാസ് മറുപടി പറഞ്ഞു. തൊഴിലാളി സംഘടനകളുമായി ചര്ച്ച ചെയ്തായിരിക്കും പദ്ധതി മുന്നോട്ടുകൊണ്ടുപോകുക. അന്നത്തെ സാഹചര്യമല്ല ഇന്നുള്ളത്. കേന്ദ്ര നയം തന്നെ മാറി, കൂടുതൽ ഉദാരമായി. മറ്റു വിവാദങ്ങളിലേക്ക് ഇപ്പോള് പോകേണ്ടതില്ല. യുഡിഎഫ് സര്ക്കാര് അന്ന് ചര്ച്ചപോലും നടത്താതെയാണ് പദ്ധതി നടപ്പാക്കിയത്. അത് വെറേ സ്ഥലത്താണ് ആരംഭിച്ചത്. ഇതിപ്പോള് കൊച്ചിയിലാണ് പദ്ധതി നടപ്പാക്കിയിരിക്കുന്നത്. സീ പ്ലെയിൻ പദ്ധതി ടൂറിസം മേഖലയുടെ മുഖം മാറ്റും. സാധാരണക്കാര്ക്കും ഗ്രൂപ്പ് ട്രിപ്പായി സീ പ്ലെയിനിൽ യാത്ര ചെയ്യാം. കുറഞ്ഞ ചെലവിൽ അവതരിപ്പിക്കാനാണ് സര്ക്കാര് ലക്ഷ്യമെന്നും റിയാസ് പറഞ്ഞു.