തിരുവനന്തപുരം: വടക്കന് കേരളത്തില് കാറ്ററിങ് യൂണിറ്റുകള് കേന്ദ്രീകരിച്ച് ഭക്ഷ്യസുരക്ഷാ വകുപ്പ് സ്പെഷ്യല് ടാസ്ക് ഫോഴ്സിന്റെ നേതൃത്വത്തില് നടത്തിയ പരിശോധനയിൽ 10 സ്ഥാപനങ്ങളുടെ പ്രവര്ത്തനം നിര്ത്തിവയ്പ്പിച്ചു. നിയമപരമായ ലൈസന്സില്ലാതെയും ഭക്ഷ്യസുരക്ഷാ മാനദണ്ഡങ്ങള്ക്ക് വിരുദ്ധമായും പ്രവര്ത്തിക്കുന്ന സ്ഥാപനങ്ങൾക്കെതിരേയാണ് നടപടിയെന്ന് ആരോഗ്യ മന്ത്രി വീണാ ജോര്ജ് അറിയിച്ചു.
നോര്ത്ത് സോണിന്റെ കീഴിലുള്ള കോഴിക്കോട്, മലപ്പുറം കണ്ണൂര്, വയനാട്, കാസര്കോട് ജില്ലകളിലെ കാറ്ററിങ് യൂണിറ്റുകളിലായിരുന്നു പരിശോധന. വിശദ പരിശോധനയ്ക്കായി 24 സ്ഥാപനങ്ങളില് നിന്നും സ്റ്റാറ്റ്യൂട്ടറി സാമ്പിളുകള് ശേഖരിച്ച് ലാബുകളില് പരിശോധനയ്ക്കയച്ചു. മറ്റ് അപാകതകള് കണ്ടെത്തിയ സ്ഥാപനങ്ങളില് 45 സ്ഥാപനങ്ങള്ക്ക് പിഴ ഒടുക്കുന്നതിനുള്ള നോട്ടീസ് നല്കുകയും 40 സ്ഥാപനങ്ങള്ക്ക് റെക്റ്റിഫിക്കേഷന് നോട്ടീസുകള് നല്കുകയും 6 സ്ഥാപനങ്ങള്ക്ക് ഇപ്രൂവ്മെന്റ് നോട്ടീസുകള് നല്കുകയും ചെയ്തു.
കാറ്ററിങ് യൂണിറ്റുകളിലെ ലൈസന്സ്, ജീവനക്കാരുടെ മെഡിക്കല് ഫിറ്റ്നസ് സര്ട്ടിഫിക്കറ്റുകള്, വെള്ളം പരിശോധിച്ച റിപ്പോര്ട്ട്, പെസ്റ്റ് കണ്ട്രോള് മാനദണ്ഡങ്ങള്, പൊതുവായ ശുചിത്വം, പാചകത്തിനായി ഉപയോഗിക്കുന്ന വസ്തുക്കള്, ഭക്ഷണം ട്രാന്സ്പോര്ട്ട് ചെയ്യുന്ന രീതികള് എന്നിവ കര്ശന പരിശോധനയ്ക്ക് വിധേയമാക്കി.
സംസ്ഥാന ഭക്ഷ്യ സുരക്ഷാ കമ്മീഷണറുടെ ഏകോപനത്തില് സ്പെഷ്യല് ടാസ്ക് ഫോഴ്സ് അംഗങ്ങളായ ഭക്ഷ്യ സുരക്ഷാ ജോയിന്റ് കമ്മീഷണര് ജേക്കബ് തോമസ്, ഡെപ്യൂട്ടി കമ്മിഷണര് എസ്. അജി, അസിസ്റ്റന്റ് കമ്മിഷണര് സക്കീര് ഹുസൈന്, എഫ്എസ്ഒ ജോസഫ് കുര്യാക്കോസ് എന്നിവരുടെ നേതൃത്വത്തിലായിരുന്നു പരിശോധന.