ആലപ്പുഴ: വാർത്താ സമ്മേളനത്തിനെത്താൻ വൈകിയ പ്രതിപക്ഷ നേതാവ് വി.ഡി. സതീശനെതിരേ പരസ്യമായി അസഭ്യ പ്രയോഗം നടത്തിയ കെപിസിസി പ്രസിഡന്‍റ് കെ. സുധാകരൻ ന്യായീകരണവുമായി രംഗത്ത്. തന്‍റെ ഭാഗത്ത് തെറ്റൊന്നുമുണ്ടായിട്ടില്ലെന്നും, മാധ്യമങ്ങൾ മാപ്പ് പറയണമെന്നുമാണ് അദ്ദേഹം പറയുന്നത്.
'മര്യാദ' എന്നാണ് താൻ പറഞ്ഞ വാക്കെന്നാണ് സുധാകരന്‍റെ വിശദീകരണം. താനും വി.ഡി. സതീശനും തമ്മിൽ പ്രശ്നമൊന്നുമില്ലെന്നും തങ്ങൾ ജ്യേഷ്ഠാനുജൻമാരെ പോലെയാണെന്നും അദ്ദേഹം പറഞ്ഞു.
പിന്നീട്, വി.ഡി. സതീശനോട് മാധ്യമ പ്രവർത്തകർ പ്രതികരണം ആരാഞ്ഞപ്പോൾ, കെ. സുധാകരൻ പറഞ്ഞതിൽ പ്രശ്നമൊന്നുമില്ലെന്നായിരുന്നു പ്രതികരണം.
''നിങ്ങളുടെ ക്യാമറമാൻ വരാൻ വൈകിയിൽ, സുധാകരേട്ടൻ പറഞ്ഞ അതേ വാക്കല്ലേ നിങ്ങളും ഉപയോഗിക്കുക'' എന്ന് ദൃശ്യ മാധ്യമ പ്രവർത്തകരോടായി സതീശൻ ചോദിക്കുകയും ചെയ്തു.
കെ. സുധാകരൻ തന്നെക്കുറിച്ച് പരസ്യമായി അസഭ്യം പറഞ്ഞതിൽ വി.ഡി. സതീശൻ അതൃപ്തനായി രാജി ഭീഷണി മുഴക്കിയെന്നും ഹൈക്കമാൻഡ് ഇടപെട്ട് പിന്തിരിപ്പിച്ചു എന്നും നേരത്തെ സൂചനകൾ പുറത്തുവന്നിരുന്നു.
''ഇയാൾ എവിടെയെന്ന്. ഇയാള്‍ എന്ത് (*അസഭ്യ വാക്ക്*) പത്രക്കാരോട് പറഞ്ഞിട്ട് എന്തൊരു മോശമാണിത്'' എന്നായിരുന്നു സുധാകരന്‍റെ വാക്കുകൾ.