പത്തനംതിട്ട: നീറ്റ് പരീക്ഷയിൽ ആൾമാറാട്ട ശ്രമം നടത്തിയ വിദ്യർഥി പിടിയിൽ. വ്യാജ ഹാൾ ടിക്കറ്റുമായി തിരുവനന്തപുരം സ്വദേശിയാണ് പിടിയിലായത്. ഞായറാഴ്ച ഉച്ചയോടെ പത്തനംതിട്ട തൈക്കാവ് വിഎച്ച്എസ്എസ് പരീക്ഷ സെന്‍ററിലായിരുന്നു സംഭവം.

തിരുവനന്തപുരം സ്വദേശിയായ മറ്റൊരു വിദ്യാർഥിയുടെ പേരിൽ വ്യാജ ഹാൾടിക്കറ്റുണ്ടാക്കിയാണ് ഈ വിദ്യാർഥി എക്സാം ഹാളിൽ കയറിയത്. തുടർന്ന് ഹാൾ ടിക്കറ്റ് പരിശോധനയിൽ തട്ടിപ്പ് കണ്ടുപിടിക്കുകയായിരുന്നു. ഉടൻ തന്നെ എക്സാം സെന്‍റർ അധികൃതർ പൊലീസിനെ വിവരമറിയിച്ചു.

പത്തനംതിട്ട പൊലീസ് എത്തി വിദ്യാർഥിയെ കസ്റ്റഡിയിലെടുത്തു. വിദ്യാർഥിയെ ചോദ്യം ചെയ്തു വരികയാണ്. സംഭവത്തിൽ, ഹാൾ ടിക്കറ്റിൽ പേരുള്ള വിദ്യാർഥിക്ക് പങ്കുണ്ടോ എന്നും, സെന്‍ററിലുള്ള ആരുടെയെങ്കിലും സഹായം ലഭിച്ചിട്ടുണ്ടോ എന്നും പരിശോധിച്ചു വരികയാണ്. ആൾമാറാട്ടം നടത്തി പരീക്ഷയെഴുതാനാണ് ശ്രമിച്ചതെന്നും സംശയിക്കുന്നു.