തൃശൂര്‍: കോണ്‍ഗ്രസ് സ്ഥനാര്‍ഥി പ്രഖ്യാപനത്തിനു മുൻപേ തൃശൂരില്‍ കെ.മുരളീധരന് വേണ്ടി ചുവരെഴുതി സിറ്റിങ് എംപി ടി.എന്‍.പ്രതാപന്‍. പ്രതാപനായി എഴുതിയ ചുവരെഴുത്തുകൾ മായിക്കാൻ കോൺഗ്രസ് നേതൃത്വം നിർദേശം നൽകിയിരുന്നു. പിന്നാലെ തന്നെ മുരളീധരനായി ചുവരെഴുത്തുകൾ തുടങ്ങി.
വടകര സിറ്റിങ് എംപി കെ. മുരളീധരൻ തൃശൂരിൽ മത്സരിക്കുമെന്ന് ഉറപ്പിച്ചതോടെയാണ് പാർട്ടി പ്രഖ്യാപനത്തിന് കാത്തു നിൽക്കാതെ ചുവരെഴുത്തുകൾ ആരംഭിച്ചത്. തെരഞ്ഞെടുപ്പു ചർച്ചകളിൽ ടി.എൻ പ്രതാപനായിരുന്നു തൃശൂരിലെ കോൺഗ്രസ് സ്ഥാനാർഥി. എന്നാൽ പത്മജ വേണു ഗോപാൽ ബിജെപിൽ ചേർന്നതോടെയാണ് തൃശൂരിലെ രാഷ്ട്രീയ സാഹചര്യം മാറിയത്.
ടി.എൻ പ്രതാപനുവേണ്ടി തൃശൂരിൽ 3 ലക്ഷത്തോളം പോസ്റ്ററുകളും നിരവധി ചുവരെഴുത്തുകളും ഉയർന്നിരുന്നു. ലോക്സഭാ സീറ്റിൽ ടി. എൻ പ്രതാപനെ ഇത്തവണ മത്സരിപ്പിക്കില്ല. പകരം നിയമസഭാ സിറ്റ് നൽകിയേക്കും. സ്ഥാനാർഥി പ്രഖ്യാപനം ഉച്ചയ്ക്ക് ശേഷമുണ്ടാവുമെന്നാണ് പുറത്തു വരുന്ന റിപ്പോർട്ടുകൾ.