ഇലക്ട്രിക് വാഹനങ്ങള്‍ക്ക് ടോളൊഴിവാക്കി മഹാരാഷ്ട്ര
മുംബൈ: ഇലക്ട്രിക് ബസുകള്‍, ഫോര്‍വീലറുകള്‍ എന്നിവയ്ക്ക് മഹാരാഷ്ടയിലെ വിവിധ അതിവേഗ ഹൈവേകളില്‍ ടോള്‍ ഒഴിവാക്കി.
മുംബൈ-പുണെ എക്‌സ്പ്രസ് വേ, ശിവ്രി-നാവസേവ ട്രാന്‍സ്ഹാര്‍ബര്‍ ലിങ്ക്, മുംബൈ-നാഗ്പുര്‍ സമൃദ്ധി എക്‌സ്പ്രസ് വേ എന്നിവയില്‍ ഇത്തരം വാഹനങ്ങള്‍ക്ക് ടോള്‍ നല്‍കേണ്ടതില്ലെന്നു സര്‍ക്കാര്‍ വ്യക്തമാക്കി.
പൊതുമരാമത്ത് വകുപ്പിനു കീഴിലുള്ള മറ്റു ഹൈവേകളില്‍ ഇത്തരം വാഹനങ്ങള്‍ക്ക് ടോളില്‍ 50% ഇളവു നല്‍കും. വൈദ്യുതിയില്‍ പ്രവര്‍ത്തിക്കുന്ന ഇരുചക്ര, മുച്ചക്ര, നാലുചക്ര പാസഞ്ചര്‍ വാഹനങ്ങള്‍ക്കും ബസുകള്‍ക്കും വിലയില്‍ 10% ഡിസ്‌കൗണ്ട് നല്‍കുമെന്നും നേരത്ത സര്‍ക്കാര്‍ വ്യക്തമാക്കിയിരുന്നു.
ഇലക്ട്രിക് വാഹനങ്ങളുടെ നിര്‍മാണവും അവയുടെ ഉപയോഗവും വര്‍ധിപ്പിക്കുകയാണ് സര്‍ക്കാര്‍ ലക്ഷ്യമെന്നും സംസ്ഥാനത്ത് ഉടനീളം ഇലക്ട്രിക് വാഹനങ്ങള്‍ക്കുള്ള ചാര്‍ജിങ് സ്റ്റേഷനുകള്‍ വര്‍ധിപ്പിക്കുമെന്നും സര്‍ക്കാര്‍ നേരത്തെ വ്യക്തമാക്കിയിരുന്നു.