മുംബൈ: ദഹിസര്‍ മുതല്‍ മീരാറോഡിലെ കാശിഗാവ് വരെയുള്ള മെട്രൊ 9 പാതയില്‍ പരീക്ഷണയോട്ടം ആരംഭിച്ചു. മുഖ്യമന്ത്രി ദേവേന്ദ്ര ഫഡ്‌നാവിസ്, ഉപമുഖ്യന്ത്രിമാരായ അജിത്പവാര്‍, ഏക്‌നാഥ് ഷിന്‍ഡെ എന്നിവര്‍ ചേര്‍ന്നാണ് പരീക്ഷണയോട്ടം ഫ്‌ലാഗ് ഓഫ് ചെയ്തത്. മെട്രൊ 9 ന്‍റെ ആദ്യഘട്ടമാണിത്. പരീക്ഷണയോട്ടം പൂര്‍ത്തിയാക്കി ഈ വര്‍ഷം സെപ്റ്റംബറോടെ ആദ്യഘട്ടം പൊതുജനങ്ങള്‍ക്ക് തുറന്നുകൊടുക്കാനാണ് നീക്കം.

ദഹിസര്‍ ഈസ്റ്റിനെ മീരാഭയന്ദറുമായി ബന്ധിപ്പിക്കുന്നതാണ് മെട്രൊ-9. ആകെ 13.5 കിലോമീറ്ററുള്ള മെട്രൊ 9ല്‍ എട്ട് സ്റ്റേഷനുകളാണ് ഉള്ളത്. ആദ്യഘട്ടത്തില്‍ 4 സ്റ്റേഷനുകളാകും തുറക്കുക. ദഹിസര്‍, പാണ്ഡുരംഗ്വാഡി, മിറാഗാവ്, കാശിഗാവ് എന്നീ സ്റ്റേഷനുകളാണ് ആദ്യഘട്ടത്തില്‍ പ്രവര്‍ത്തന സജ്ജമാകുക. 6607 കോടി രൂപയാണ് പദ്ധതി. നഗരഗതാഗത്തിന് പുതുമുഖം നല്‍കുന്ന പദ്ധതിയെന്ന നിലയില്‍ ഏറെ ശ്രദ്ധ പിടിച്ചു പറ്റുന്ന പാതയാണിത്.