മുംബൈ: ജൂലൈ മാസത്തിൽ നഗരത്തിൽ ലഭിച്ച മഴയുടെ അളവ് ഏകദേശം ഇരട്ടിയോളമെന്ന് കാലാവസ്ഥ വകുപ്പ്. തിങ്കളാഴ്ച വരെയുള്ള കണക്കുകളാണ് ഐ എം ഡി പുറത്ത് വിട്ടത്. ഒരാഴ്ച്ച കൂടി ഈ മാസത്തിൽ ബാക്കി നിൽക്കേ ഈ കണക്കുകൾ ഇനിയും വർധിച്ചേക്കാം. ജൂലൈ മാസത്തിൽ ശരാശരി 855 മില്ലീമീറ്ററാണ് നഗരത്തിൽ മഴ ലഭിക്കാറുള്ളത്. എന്നാൽ ഈ വർഷം 1,408 മില്ലീമീറ്ററോളം ഇതുവരെ ലഭിച്ചിട്ടുണ്ട്.48 ശതമാനം അധികമാണ് ഇതെന്ന് കണക്കുകൾ വ്യക്തമാക്കുന്നു.ജൂലൈയിൽ മഴ 1,500 മില്ലിമീറ്ററിൽ കൂടുതലാകുമെന്ന് വിദഗ്ധർ പ്രതീക്ഷിക്കുന്നു.

ജൂലൈയിൽ രേഖപ്പെടുത്തിയ ഏറ്റവും ഉയർന്ന മഴ 2023 ൽ 1,771 മില്ലിമീറ്ററായിരുന്നു.

അതേസമയം മുംബൈ, താനെ, പാൽഘർ ജില്ലകളിൽ ഇന്നും കനത്ത മഴ പെയ്തേക്കുമെന്നു കാലാവസ്ഥ വിഭാഗം മുന്നറിയിപ്പ് നൽകിയിട്ടുണ്ട്. മൂന്നു ജില്ലകളിലും 'യെല്ലോ' അലർട്ട് ഐഎംഡി പുറപ്പെടുവിച്ചു. ബുധനാഴ്ച, മുംബൈ,താനെ, പാൽഘർ ജില്ലകളിൽ 'ഓറഞ്ച്' അലർട്ട് ഉണ്ട്.