വി.ഡി. സതീശനുമായി കൂടിക്കാഴ്ച നടത്തി നാസിക് മലയാളി കള്ച്ചറല് അസോസിയേഷന് പ്രതിനിധികള്
മുംബൈ: മഹാരാഷ്ട്രയിലെ മലയാളികളുടെ സമഗ്ര പുരോഗതിക്കും ക്ഷേമത്തിനുമായി കേരള സര്ക്കാര് വേണ്ട പിന്തുണ നല്കുമെന്ന് മുഖ്യമന്ത്രി വി.ഡി. സതീശന്. നാസിക് മലയാളി കള്ച്ചറല് അസോസിയേഷന് (എന്എംസിഎ) പ്രതിനിധി സംഘം നടത്തിയ കൂടിക്കാഴ്ചയിലാണ് മുഖ്യമന്ത്രി നിലപാട് വ്യക്തമാക്കിയത്. മഹാരാഷ്ട്രയിലെ പ്രവാസി മലയാളി സമൂഹത്തിന്റെ പേരില് പ്രതിനിധി സംഘം മുഖ്യമന്ത്രിക്ക് ഹൃദയം നിറഞ്ഞ അഭിനന്ദനങ്ങള് അറിയിച്ചു.
സൗഹൃദ അന്തരീക്ഷത്തില് നടന്ന ചര്ച്ചയില് മഹാരാഷ്ട്രയിലെ മലയാളി സമൂഹം നേരിടുന്ന വിവിധങ്ങളായ പ്രശ്നങ്ങള് മുഖ്യമന്ത്രിയുടെ ശ്രദ്ധയില്പ്പെടുത്തി. യാത്രാസൗകര്യങ്ങള് വര്ദ്ധിപ്പിക്കുക, സാംസ്കാരിക പ്രവര്ത്തനങ്ങള്ക്ക് സര്ക്കാര് തലത്തില് കൂടുതല് പ്രോത്സാഹനവും പിന്തുണയും ലഭ്യമാക്കുക, അന്തര്സംസ്ഥാന വ്യാപാര-വ്യവസായ മേഖലകളില് പ്രവര്ത്തിക്കുന്ന പ്രവാസി മലയാളികള്ക്ക് ആവശ്യമായ സഹായങ്ങള് ഉറപ്പാക്കുക തുടങ്ങിയ ആവശ്യങ്ങള് പ്രതിനിധികള് ഉന്നയിച്ചു.
പ്രവാസി മലയാളികളുടെ ക്ഷേമം ഉറപ്പാക്കുന്നതിനും അവരുടെ ന്യായമായ ആവശ്യങ്ങള് പരിഹരിക്കുന്നതിനും കേരള സര്ക്കാര് എപ്പോഴും ഒപ്പമുണ്ടാകുമെന്ന് മുഖ്യമന്ത്രി വി.ഡി. സതീശന് പ്രതിനിധി സംഘത്തിന് ഉറപ്പുനല്കി. അസോസിയേഷന് ജനറല് സെക്രട്ടറി അനൂപ് പുഷ്പാംഗതന്, വൈസ് പ്രസിഡന്റ് വിശ്വനാഥന് പിള്ള, കമ്മിറ്റി അംഗം അനില് ഓച്ചിറ എന്നിവരടങ്ങുന്ന സംഘമാണ് കൂടിക്കാഴ്ചയില് പങ്കെടുത്തത്