ന്യൂഡൽഹി: വിദ്യാർഥി പ്രക്ഷോഭത്തിന്‍റെ മറവിൽ രാജ്യത്താകെ കലാപവും കൊലപാതകങ്ങളും നടത്തിയവർക്കു ശിക്ഷ ഉറപ്പാക്കണമെന്നു ബംഗ്ലാദേശ് മുൻ പ്രധാനമന്ത്രി ഷെയ്ഖ് ഹസീന. ബംഗ്ലാദേശ് സ്ഥാപകനും തന്‍റെ പിതാവുമായ ഷെയ്ഖ് മുജിബുർ റഹ്മാന്‍റെ സ്മാരകം തകർത്തവരും ശിക്ഷിക്കപ്പെടണമെന്ന് അവർ ആവശ്യപ്പെട്ടു. ഇന്ത്യയിൽ അജ്ഞാതകേന്ദ്രത്തിൽ കഴിയുന്ന ഹസീന, സ്ഥാനഭ്രഷ്ടയായശേഷമുള്ള ആദ്യ പ്രസ്താവനയാണിത്. മകൻ സജീബ് വസീദിന്‍റെ സമൂഹമാധ്യമ അക്കൗണ്ടിലൂടെയാണ് ഇതു പങ്കുവച്ചത്.
പ്രക്ഷോഭത്തിന്‍റെ പേരിൽ ജൂലൈ മുതൽ രാജ്യത്തു നടന്നത് നശീകരണ നൃത്തമായിരുന്നു. പിതാവുൾപ്പെടെ കുടുംബാംഗങ്ങളെ നഷ്ടമായ തന്നെപ്പോലെ ഉറ്റവർ കൊല്ലപ്പെട്ടവരെയോർത്ത് താനും ദുഃഖിക്കുന്നുവെന്നുവെന്നു ഹസീന പറഞ്ഞു. പുരോഗതിയിലേക്കു നീങ്ങുകയായിരുന്ന രാജ്യം വലിയ പ്രതിസന്ധിയിലേക്കാണ് തള്ളിയിടപ്പെട്ടതെന്നും ഹസീന.